پاکستان میں ’یوم سیاہ‘ پر بھارت مخالف مظاہرے
پاکستان اور آزاد کشمیر میں بھارت کا یوم آزادی، یوم سیاہ کے طور پر منایا گیا، اس موقع پر اسلام آباد سمیت چاروں صوبائی دارالحکومتوں کی تمام سرکاری عمارتوں پر قومی پرچم سرنگوں رہا۔
یوم سیاہ کے موقع پر کشمیریوں سے اظہار یکجہتی اور بھارت کے یوم آزادی کو یوم سیاہ کے طور پر منانے کے لیے ملک کے چھوٹے بڑے شہروں میں ریلیاں نکالی گئیں۔
اسلام آباد اور راولپنڈی میں یوم سیاہ کی مناسبت سے بھارت مخالف ریلیاں نکالی گئیں اور کُل جماعتی حریت کانفرنس نے بھارتی ہائی کمیشن کے قریب مظاہرہ کیا۔
کراچی سمیت سندھ کے شہروں سکھر اور حیدرآباد میں بھی یوم سیاہ کے موقع پر احتجاجی مظاہرے اور ریلیاں نکالی گئیں جبکہ پنجاب کے دارالحکومت لاہور میں یوم سیاہ کے حوالے سے سب سے بڑی ریلی منعقد کی گئی۔
بلوچستان میں یوم سیاہ کے موقع پر مختلف سیاسی جماعتوں سمیت سماجی اراکین نے کشمیری عوام کے ساتھ اظہار یکجہتی کے لیے ریلی نکالی۔
پشاور میں بھی کشمیریوں سے اظہار یکجہتی کی گئی جبکہ بھارتی جارحیت کے خلاف یوم سیاہ منایا گیا اور چوک یاد گار اور چمکنی کے علاقے میں احتجاجی مظاہرے کیے گئے اور ریلیاں نکالی گئیں۔
