انگلینڈ 27 سال بعد ورلڈ کپ فائنل میں
انگلینڈ نے جیسن روئے کی شاندار بیٹنگ کی بدولت ورلڈ کپ کے دوسرے سیمی فائنل میں دفاعی چیمپیئن آسٹریلیا کو 8 وکٹوں سے شکست دے کر ایونٹ سے باہر کرنے کے ساتھ ساتھ 27 سال بعد ورلڈ کپ فائنل کے لیے کوالیفائی کر لیا۔
برمنگھم میں کھیلے گئے دوسرے سیمی فائنل میچ میں میزبان آسٹریلیا کے کپتان ایرون فنچ نے پہلے بیٹنگ کرنے کا فیصلہ کیا جو درست ثابت نہ ہوسکا۔
محض 14 کے مجموعے پر تین کھلاڑیوں کے آؤٹ ہونے کے بعد اسٹیو اسمتھ اور ایلکس کیری نے ٹیم کو سنچری پارٹنر شپ فراہم کی اور بحران سے نکالا۔
آسٹریلیا کی پوری ٹیم 49 اوورز میں 223 رنز بنا کر آؤٹ ہو گئی اور بلے بازوں کی ناقص کارکردگی کا اندازہ اس بات سے لگایا جا سکتا ہے کہ 7 کھلاڑی دوہرے ہندسے میں بھی داخل نہ ہو سکے۔
ہدف کے تعاقب میں انگلش اوپنرز جیسن روئے اور بیئراسٹو نے اپنی ٹیم 124رنز کا آغاز فراہم کر کے میچ کو یکطرفہ بنا دیا۔
اس شراکت خاتمہ اس وقت ہوا جب مچل اسٹارک کی گیند پر 34 رنز بنانے والے بیئراسٹو ایل بی ڈبلیو قرار پائے۔
جیسن روئے کو 147 کے مجموعی اسکور پر امپائر کے غلط فیصلے کی وجہ سے 85 رنز کی اننگز کھیل کر پویلین لوٹنا پڑا۔
اس کے بعد جو روٹ اور کپتان آئن مورگن نے مزید کوئی وکٹ نہ گرنے دی اور بہترین کھیل پیش کرتے ہوئے 32.1 اوورز میں ہی اپنی ٹیم کو ہدف تک رسائی دلا دی، روٹ 49 اور مورگن 45 رنز بنا کر ناٹ آؤٹ رہے۔
