سندھ حکومت نے ’دیت‘ کے 33 کروڑ روپے ادا کرکے 37 قیدیوں کو رہا کردیا
سندھ حکومت نے متاثرہ اہلخانہ کو دیت، دم اور ارش کی مد میں 33 کروڑ 90 لاکھ روپے ادا کرکے مختلف جیلوں میں جرمانے کی عدم ادائیگی کے باعث قید 37 قیدیوں کو رہا کردیا۔
ڈان اخبار میں شائع رپورٹ کے مطابق جیل حکام نے سندھ حکومت کے مذکورہ اقدام کو مثبت اور متعدد غریب قیدیوں کے اہلخانہ کے لیے مسرت کا باعث قرار دیا۔
یہ بھی پڑھیں: حکومت نے 514 قیدیوں کا جرمانہ ادا کر کے انہیں رہا کردیا
اس حوالے سے بتایا گیا کہ رہائی پانے والے قیدی اپنی سزائیں مکمل کرچکے تھے تاہم متاثرہ خاندان کو جرمانے کی عدم ادائیگی کے باعث مزید قید کاٹ رہے تھے۔
ذرائع نے بتایا کہ سینٹرل جیل کراچی سے 10، ملیر جیل سے 4، حیدرآباد جیل سے 13، لاڑکانہ جیل سے 4 اور سانگھڑ جیل سے ایک قیدی اپنی سزا مکمل کر چکے تھے تاہم وہ جرمانے کی رقم ادا کرنے سے قاصر تھے۔
انہوں نے بتایا کہ صوبائی حکومت کی جانب سے جمع کردہ معلومات کے مطابق مذکورہ تمام 37 قیدی غریب خاندانوں سے تعلق رکھتے ہیں جو جرمانے کی رقم ادا نہیں کرسکتے تھے۔
مزیدپڑھیں: سندھ کابینہ اجلاس: عمر رسیدہ قیدیوں کی رہائی کی منظوری
ذرائع نے بتایا کہ رہائی نصیب پانے والے تمام قیدیوں کا مجرمانہ ریکارڈ نہیں تھا۔
وزیر برائے جیل خانہ جات سید ناصر حسین شاہ نے بتایا کہ موجودہ صورتحال سندھ حکومت کی مداخلت کی متقاضی تھی۔
انہوں نے کہا کہ ہم نے یہ اقدام اس لیے اٹھایا کہ عدالت کی جانب سے عائد قیدیوں پر جرمانے کی رقم کوئی انفرادی شخص ادا نہیں کرسکتا۔
صوبائی وزیر کا کہنا تھا کہ جرمانے کی رقم بہت بڑی تھی اور تمام قیدی غریب خاندانوں سے تعلق رکھتے ہیں جن کی کوئی مجرمانہ سرگرمیاں بھی نہیں تھیں۔
یہ بھی پڑھیں: سعودی جیلوں سے پاکستانی قیدیوں کی رہائی، رمضان میں اچھی خبر ملنے کا امکان
ہائی کورٹ کے وکیل حیدر علی حیدر نے صوبائی حکومت کے اس اقدام کو سراہتے ہوئے کہا کہ ’ایسے اقدامات ملک کو فلاحی ریاست کے سانچے میں ڈھالتے ہیں‘۔
لائیو ٹی وی