ندی نالوں، چشموں، دریاؤں، جنگلات، سبزہ، جھیلوں اور جادوئی پہاڑوں اور شور مچاتے جھرنوں میں گھری ہوئی سوات کی وادی کالام موسم گرما میں سیاحوں کے لیے جنت کا مقام ہے لیکن سردیوں میں اس کا ایک الگ روپ ہے جب یہ سفیدی اوڑھتی ہے تو سیاحوں کے لیے برفیلی جنت بن جاتی ہے۔

کالام کے جنگلات اور پہاڑ سردیوں میں برف سے ڈھک جاتے ہیں اور گلیشرز کا روپ دھا لیتے ہیں، جھیلیں جم جاتی ہیں۔

رواں برس کالام میں شدید برف باری ہوئی ہے جس کے باعث سیاحوں کی دل کشی میں مزید اضافہ ہوا ہے اور ملک بھر سے آئے سیاح قدرتی مناظر سے لطف اندوز ہورہے ہیں۔

چارسدہ سے آئے سیاح توصیف احمد کا کہنا تھا کہ 'برف باری اور برف سے ڈھکے علاقے کو دیکھنے کا خواب بالآخر سچ ثابت ہوا، وادی کالام سردیوں میں غیر معمولی خوب صورت ہوتی ہے جب پوری وادی میں برف کی چار تن جاتی ہے'۔

ایک اور سیاح عاصم خان کا کہنا تھا کہ 'میں نے کالام میں دو روز گزارے اور برف کے یہ مناظر بالکل مختلف ہیں، میں مختلف مقامات میں جاچکا ہوں اور یہاں سے جانے کا دل نہیں چاہتا'۔

وادی کالام کو برف میں دیکھنے کے لیے کراچی سے بھی سیاح موجود ہیں اور وہ کالام کی خوب صورت سے بے حد متاثر نظر آتے ہیں۔

بشریٰ علی اپنے اہل خانہ کے ساتھ کراچی سے آئی ہیں اور اپنے تاثرات بیان کرتے ہوئے کہتی ہیں کہ 'برف سے ڈھکے اونچے پہاڑ جادوئی اور پراسرار ہیں، چند مناظر تو لوگوں کے لیے بہت خوب صورت اور فن کارانہ ہیں'۔