ضمنی انتخابات: قومی اور صوبائی اسمبلی کی 35 نشستوں پر پولنگ
ملک میں قومی اسمبلی کی 11 اور صوبائی اسمبلی کی 24 نشستوں پر ضمنی انتخابات کا عمل مکمل ہوگیا۔
الیکشن کمیشن کے ریزلٹ ٹرانسمیشن سسٹم (آر ٹی ایس) کے تحت قومی اسمبلی کے حلقوں کے نتائج کے مطابق لاہور کے حلقہ 124 میں مسلم لیگ (ن) کے شاہد خاقان عباسی، راولپنڈی این اے 60 میں تحریک انصاف کے شیخ راشد، این اے 69 (گجرات) میں مسلم لیگ (ق) کے مونس الہیٰ، این اے 65 (چکوال) میں مسلم لیگ (ق) کے چوہدری سالک حسین، این اے 131 (لاہور) میں مسلم لیگ (ن) کے سعد رفیق اور این اے 56 (اٹک) میں مسلم لیگ (ن) کے سہیل خان نے سب سے زیادہ ووٹ حاصل کیے۔
قومی و صوبائی اسمبلی کی 35 نشستوں کے لیے پولنگ کا عمل صبح 8 بجے سے شام 5 بجے تک بلاتعطل جاری رہا جس کے لیے سیکیورٹی کے سخت اقدامات کیے گئے تھے۔
ملک بھر میں قومی اور پنجاب اسمبلی کے 11، 11 حلقوں کے ساتھ ساتھ خیبر پختونخوا اسمبلی کے 9، سندھ اور بلوچستان اسمبلیوں کے 2، 2 حلقوں میں ضمنی انتخابات کے لیے 600 سے زائد امیدوار مدمقابل تھے۔
