’جیبی‘ طوفان نے جاپان میں کاروبارِ زندگی معطل کردیا
جاپان کے مغربی علاقے میں آنے والے ’جیبی ‘ نامی طوفان نے کاروبارِ زندگی بالکل معطل کر کے رکھ دیا جسے گزشتہ 25 سالوں کا سب سے شدید طوفان قرار دیا جارہا ہے۔
فرانسیسی خبر رساں ادارے ’اے ایف پی‘ کےمطابق طوفان کے دوران ہواؤں کے تیز جھکڑ اور شدید بارش کا سلسلہ جاری رہا جس کی وجہ سے 10 لاکھ سے زائد لوگوں کی نقل مکانی کا خدشہ پیدا ہوگیا۔
اس سلسلے میں جاپانی وزیراعظم شنزو ابے نے عوام پر زور دیا کہ جلد از جلد متاثرہ علاقوں سے نقل مکانی کرکے اپنی زندگی محفوظ بنائیں، علاوہ ازیں انہوں نے حکومت کو تمام تر حفاظتی اقدامات کرنے کی بھی ہدایت کی۔
طوفان کے دوران ہوا کی رفتار 216 کلومیٹر فی گھنٹہ رہی جس کے باعث نہ صرف کئی گھروں کی چھتیں اڑ گئیں بلکہ کئی عمارتوں کے ڈھانچے زمین بوس ہوگئے اور متعدد گاڑیاں بھی الٹ گئیں۔
موسم کی شدید صورتحال کے باعث تمام پروازیں منسوخ کردیں گئیں اس کے ساتھ ٹرینوں کی آمد و رفت بھی معطل کردی گئی جبکہ لوگ بھی گھروں میں محصور ہوگئے۔
