سوات میں طالبان کا تباہ کردہ بدھا کا مجسمہ بحال
سوات میں پہاڑ پر تراشے گئے 7ویں صدی عیسوی سے تعلق رکھنے والے بدھا کے مجسمے کو بحال کردیا گیا، اسے 2007 میں پاکستانی طالبان نے تباہ کردیا تھا۔
ہمالیہ کے دامن میں واقع سوات کے علاقے جہان آباد میں بدھ مت سے تعلق رکھنے والے کئی آثار قدیمہ موجود ہیں جنہیں اطالوی حکومت اور مقامی انتظامیہ کی مدد سے بحال کیا جارہا ہے، جس کے بعد یہاں سیاحوں کی آمد میں اضافہ متوقع ہے۔
بدھا مجسمے کے مرمتی کام کا آغاز 2012 میں کیا گیا اور اس کے لیے خاص طور پر لیبارٹری میں لیزر ٹیکنالوجی اور پرانی تصاویر کی مدد سے 3D نمونہ تیار کیا گیا۔
خیال رہے کہ اطالوی آرکیالوجی کا مشن 1955 سے سوات میں آثار قدیمہ کی بحالی کے کام سر انجام دے رہا ہے جبکہ اطالوی حکومت گزشتہ 5 سال کے دوران سوات کے تاریخی ورثے کی بحالی کے لیے 29 لاکھ ڈالر خرچ کرچکی ہے۔
