پاکستان تحریک انصاف (پی ٹی آئی) کے چیئرمین عمران خان نے حال ہی میں صوبہ سندھ کے دارالحکومت کراچی کا دورہ کیا۔

عمران خان کی جانب سے صوبائی دارالحکومت کے دورے کا مقصد اپنے پارٹی امیدواروں کی انتخابی مہم میں حصہ لینا اور کراچی کے عوام کی محبت کا جواب دینا تھا۔

اگرچہ میڈیا میں عمران خان کے والہانہ استقبال اور ان کی جانب سے کراچی کے مختلف دوروں کی ویڈیوز اور تصاویر سامنے آئیں، تاہم سوشل میڈیا پر اس دوران کچھ ایسی ویڈیوز بھی وائرل ہوئیں جو زیادہ تر میڈیا کی توجہ کا مرکز نہیں بنیں۔

پاکستان مسلم لیگ (ن) کی سابق رکن اسمبلی اور رہنما مازیہ حمید کے نام سے بنائے گئے ٹوئٹر اکائونٹ سے شیر کی گئی عمران خان کے کراچی کے دورے کی مختصر ویڈیو میں انہیں عام لوگوں کی مزاحمت سے بیچ سڑک پر قافلے سمیت رکتے ہوئے دیکھا جا سکتا ہے۔

مختصر ویڈیو میں عمران خان کو عارف علوی سمیت دیگر پارٹی رہنمائوں کے ساتھ لوگوں کی بدنظمی سے جہاں پریشان ہوتے ہوئے دیکھا جاسکتا ہے، وہیں انہیں مجبور ہوکر گاڑی میں بیٹھ کر آگے جانے کے بجائے پیچھے واپس جاتے ہوئے دیکھا جاسکتا ہے۔

مازیہ حمید نے ویڈیو شیئر کرتے ہوئے لکھا کہ میڈیا کبھی نہیں دکھائے گا، عمران خان عارف علوی سمیت حلقے کے دورے پر نکلے تو انہیں مزاحمت کا سامنا کرنا پڑا۔

عمران خان کی اسی ویڈیو کو دیگر لوگوں نے بھی ٹوئیٹ پرشیئر کیا اور دعویٰ کیا کہ عوام نے پی ٹی آئی چیئرمین سے دست و گریباں ہونے کی کوشش کی۔