کنگنا رناوٹ پہلی بار کانز میں جلوہ گر ہوں گی؟
فلمی دنیا کے بڑے میلوں میں شمار ہونے والا ’کانز‘ فیسٹیول آئندہ ماہ مئی میں ہوگا، جس کے لیے تیاریاں زوروں سے جاری ہیں۔
71 ویں کانز فیسٹیول کا آغاز آئندہ ماہ 8 مئی سے ہوگا، جو 19 مئی تک جاری رہے، میلے میں نہ صرف ہولی وڈ بلکہ بولی وڈ سمیت دنیا کے متعدد ممالک کی فلم انڈسٹریز کے ستارے شرکت کریں گے۔
کانز فلم فیسٹیول کے حوالے سے تازہ خبر یہ ہے کہ رواں برس بولی وڈ اداکارہ کنگنا رناوٹ میلے میں پہلی بار شرکت کریں گی۔
پنک ولا کے مطابق ’کوئین‘ اداکارہ کنگنا رناوٹ پہلی بار کانز کے ریڈ کارپٹ پر جلوے بکھیرتی نظر آئیں گی۔
خبر کے مطابق کنگنا رناوٹ سفیر کے طور پر ریڈ کارپٹ پر واک کرتی نظر آئیں گی، تاہم یہ کہنا قبل از وقت ہے کہ اداکارہ کس ادارے کی سفیر بن کر جلوہ بکھیریں گی۔
یہ بھی پڑھیں: کانز میلے میں دپیکا پڈوکون کے اسٹائل کی دھوم
ابھی یہ بھی واضح نہیں ہے کہ کنگنا رناوٹ کانز میلے میں کس دن شرکت کریں گی، تاہم امکان ہے کہ وہ آخری 5 دنوں میں ریڈ کارپٹ پر جلوے بکھیرتی نظر آئیں گی۔
خیال رہے کہ کنگنا رناوٹ سے قبل گزشتہ برس ڈمپل گرل دپیکا پڈوکون بھی پہلی بار کانز فیسٹیول میں شریک ہوئی تھیں۔
دپیکا پڈوکون نے فیشن برانڈ لوریئل کی سفیر کی حیثیت میں شرکت کی تھی۔
ان سے قبل بار بی ڈول کترینہ کیف نے بھی 2015 میں پہلی بار کانز میں جلوے بکھیرے تھے، وہ بھی لوریئل کی سفیر بن کر ریڈ کارپٹ واک کرتی نظر آئیں تھی۔
مزید پڑھیں: کانز ریڈ کارپٹ ایشوریا کے نام
لوریئل فیشن برانڈ نے گزشتہ برس کترینہ کی جگہ دپیکا کو اپنا سفیر مقرر کیا تھا۔
اب رواں برس کنگنا رناوٹ بھی پہلی بار کانز میں جلوے بکھیرتی نظر آئیں گی، خیال کیا جا رہا ہے کہ وہ بھی اسی فیشن برانڈ کی سفیر بن کر شرکت کریں گی۔
اسی فیشن برانڈ کی جانب اداکارہ ایشوریا رائے اور سونم کپور گزشتہ کئی سال سے کانز میں جلوے بکھیرتی نظر آ رہی ہیں۔
لائیو ٹی وی