اسرائیلی فوج کی فائرنگ، فلسطین میں 2014 کے بعد بدترین خونی دن
فلسطین میں حماس کے زیر کنٹرول علاقے غزہ میں اسرائیل کے قبضے کے 70 سال کے تکمیل اور دہائیوں سے سرحد بند کرنے کے خلاف وسیع پیمانے پر احتجاج کیا جارہا ہے جہاں اسرائیلی فوج کی جانب سے فائرنگ کی گئی جبکہ مظاہرین نے پتھراؤ کیا۔
فلسطین اور اسرائیل کے درمیان قائم سرحد کے قریب فلسطینی مظاہرین کے خلاف ہونے والی فائرنگ کے نتیجے میں تاحال 15 افراد جاں بحق ہوچکے ہیں۔
فلسطینی وزارت صحت کے مطابق 1400 سے زائد افراد زخمی بھی ہوگئے۔
خیال رہے کہ فلسطینیوں کی جانب سے 15 مئی کو اسرائیل کے قبضے کے 70 برس مکمل ہونے کے سلسلے میں احتجاج کا سلسلہ شروع کیا گیا ہے جس میں تازہ واقعے سے مزید شدت آگئی ہے۔
اسرائیل کی جانب سے جب 1948 میں فلسطین کے وسیع علاقے میں قبضہ کیا گیا تو متاثرین کی سب سے زیادہ تعداد غزہ پہنچی تھی جو موجودہ اسرائیل میں اپنی جائیدادیں اور زمینیں چھوڑ کر ہجرت کرنے پر مجبور ہوئے تھے۔
