بیوی جاسوسی کیس: نوازالدین صدیقی کا وکیل گرفتار
رواں ماہ 10 مارچ کو یہ خبر سامنے آٗئی تھی کہ بھارتی پولیس نے بولی وڈ اداکار نوازالدین صدیقی کو اپنی بیوی کی جاسوسی کے الزام میں انہیں سمن جاری کیا ہے۔
خبر کے مطابق نوازالدین صدیقی، ان کی اہلیہ انجلی عرف عالیہ صدیقی اور ان کے وکیل رضوان صدیقی کو پولیس نے سمن جاری کرتے ہوئے ہدایت کی تھی کہ وہ تھانے پہنچ کر بیان ریکارڈ کرائیں۔
اداکار اور ان کی بیوی کو ممبئی کے نواحی شہر تھانے کی کرائم برانچ پولیس نے سمن جاری کیا تھا۔
اداکار پر الزام تھا کہ انہوں نے نجی جاسوسوں کے ذریعے اپنی بیوی کے فون کا ڈیٹا حاصل کرنے کی کوشش کی۔
پولیس نے اداکار کو اس وقت سمن جاری کیے جب پولیس نے‘کال ڈیٹیل ریکارڈ‘ (سی ڈی آر) کیس میں جاسوسوں سمیت 11 افراد کو گرفتار کرکے تفتیش کی۔
پولیس کے مطابق اداکار کو گرفتار افراد کی نشاندہی کے بعد سمن جاری کیے۔
یہ بھی پڑھیں: نوازالدین صدیقی پر بیوی کے فون ریکارڈ کی جاسوسی کا الزام
گرفتار افراد پر الزام تھا کہ انہوں نے ہائی پروفائیل افراد اور ان کے اہل خانہ کے فون کا ڈیٹا ریکارڈ کرکے اسے فروخت کیا۔
اگرچہ اس خبر کے چار دن بعد اداکار نوازالدین صدیقی کی اہلیہ نے فیس بک پوسٹ کے ذریعے خبر کو جھوٹا قرار دیتے ہوئے وضاحت کی کہ ان کے شوہر کو اعلیٰ شخصیت ہونے پر نشانہ بنایا جا رہا ہے۔
اداکار کی بیوی کا کہنا تھا کہ وہ اور ان کے شوہر 2 الگ الگ مذاہب سے تعلق رکھنے کے باوجود گزشتہ 15 سال سے خوشی کی زندگی گزار رہے ہیں اور ان کے درمیان کوئی بھی نفرت یا تلخی کی بات نہیں۔
اسی کیس میں ہونے والی تازہ رفت یہ ہے کہ پولیس نے نوازالدین صدیقی کو اسی کیس میں کلیئر قرار دیتے ہوئے ان کے وکیل کو گرفتار کرلیا۔
دکن کیرونیکل کے مطابق ممبئی پولیس نے بولی وڈ ورسٹائل اداکار نوازالدین صدیقی کے وکیل کواداکار کی بیوی کی جاسوسی کرنے کے کیس میں گرفتار کرلیا۔
ممبئی پولیس نے اداکار کے وکیل رضوان صدیقی کو 16 مارچ کو گرفتار کیا۔
اداکار کے وکیل پر الزام ہے کہ انہوں نے پولیس کی جانب سے سمن جاری کیے جانے کے باوجود تھانے پہنچ کر بیان ریکارڈ نہیں کروایا، جب کہ وہ غیر قانونی طور پر نوازالدین صدیقی کی اہلیہ کے فون کا ڈیٹا ریکارڈ کرنے میں بھی ملوث ہیں۔
نوازالدین صدیقی کے وکیل نے اپنی گرفتاری پر جاری کیے گئے بیان میں پولیس کے اقدامات کو غیر قانونی اور ماورائے عدالت قرار دیا۔
مزید پڑھیں: جاسوسی کیے جانے پر نوازالدین کی اہلیہ نے خاموشی توڑدی
نوازالدین صدیقی کے وکیل کا کہنا تھا کہ انہوں نے اسی کیس میں 23 فروری کو اپنا بیان ریکارڈ کروایا تھا، جب کہ انہیں عدالتی حکم نامے کے بغیر گرفتار کرکے ان سے تمام ڈیٹا چھین لیا گیا۔
دوسری جانب ممبئی پولیس نے اسی کیس میں نوازالدین صدیقی کو کلیئر قرار دے دیا ہے۔
بھارتی نشریاتی ادارے ’ایشین انٹرنیشنل نیوز‘ (اے این آئی‘ کے مطابق تھانے کے پولیس کمشنر پرمبیر سنگھ نے اس بات کی تصدیق کی کہ پولیس کو سی ڈی آر کیس میں اداکار کا کوئی کردار نہیں ملا۔
ان کا کہنا تھا کہ سی ڈی آر کیس میں نوازالدین صدیقی کو براہ راست ملوث نہیں پایا گیا، تاہم انہیں عینی گواہ کے طور پر پیش ہوکر اپنا بیان ریکارڈ کرانے کے لیے سمن جاری کیا گیا تھا۔
واضح رہے کہ 7 دن گزر جانے کے باوجود نوازالدین صدیقی نے پولیس تھانے پہنچ کر بیان ریکارڈ نہیں کروایا۔
لائیو ٹی وی