گولڈن گلوب ایوارڈز: کون، کون لے اڑا؟

تقریب میں تقریبا تمام مہمان سیاہ لباس پہن کر شریک ہوئے—فوٹو: اے ایف پی

انٹرٹینمنٹ ڈیسک شائع January 8, 2018 اپ ڈیٹ January 13, 2018

گولڈن گلوب ایوارڈز: کون، کون لے اڑا؟

آسکر ایوارڈز کے بعد فلمی دنیا میں دوسرے بڑے ایوارڈ کا اعزاز رکھنے والے گولڈن گلوب ایوارڈز کی 75 ویں تقریب کیلیفورنیا کے فیشن ڈسٹرکٹ بیورلی ہلزمیں منعقد ہوئی۔

روایات سے ہٹ کر اس بار ایوارڈز تقریب میں تقریبا تمام ستارے مختلف رنگوں کے بجائے سیاہ رنگ کے لباس میں نظر آئے۔

کئی اداکاراؤں و اداکاروں نے پہلی ہی گولڈن گلوب ایوارڈز کی تقریب میں احتجاج کے طور پر سیاہ لباس پہن کر شرکت کرنے کا اعلان کیا تھا۔

اداکاراؤں و اداکاروں کی جانب سے سیاہ لباس میں شرکت سے گولڈن گلوب کا ریڈ کارپٹ 'سیاہ کارپٹ' میں بدل گیا۔

اداکاراؤں واداکاروں نے سیاہ لباس ہولی وڈ پروڈیوسر ہاروی وائنسٹن سمیت دیگر اداکاروں و ڈائریکٹرز کی جانب سے فلم انڈسٹری کی خواتین کو جنسی طور پر ہراساں کیے جانے کے خلاف بطور احتجاج پہنا۔

ایوارڈ تقریب میں میزبان سیٹھ میئرس نے امریکی صدر ڈونلڈ ٹرمپ، ہولی وڈ پروڈیوسر ہاروی وائنسٹن اور اداکار کیون اسپیسی پرطنز کے تیر برسائے۔

واضح رہے کہ ہولی وڈ سے تعلق رکھنے والے 300 سے زائد اداکاروں، ڈائریکٹرز، لکھاریوں اور دیگر افراد نے 'ٹائمز اپ' کے نام سے مہم شروع کر رکھی ہے، جس کا مقصد دوران ملازمت خاص طور پرخواتین کو جنسی طور پر ہراساں کیے جانے کے مسئلے کو اجاگر کرنا ہے۔

اوپرا ونفرے کو لائیف ٹائم ایوارڈ دیا گیا—فوٹو: اے پی

گولڈن گلوب ایوارڈ تقریب میں ٹی وی میزبان اوپرا ونفرے پہلی سیاہ فام خاتون ٹھہریں جنہیں ان کی لائف ٹائم خدمات کے لیے ’سیشل بی ڈی ملی ایوارڈ‘ کے اعزاز سے نوازا گیا۔

ایوارڈ منعقد کرنے والے منتظم ادارے 'ہولی وڈ فارن پریس ایسوسی ایشن' نے آزادی صحافت کے فروغ لیے 20 لاکھ ڈالرز عطیے کا اعلان بھی کیا۔