چینی ڈاکٹر پاکستان میں آنکھوں کی 500 مفت سرجریز کریں گے
کراچی: پاکستان میڈیکل ایسوسی ایشن (پی ایم اے) نے اعلان کیا ہے کہ جنوری میں چینی ماہرِ امراض چشم کی ٹیم کراچی میں آنکھوں کی 500 مفت سرجریز کرے گی۔
اس حوالے سے پی ایم اے ہاؤس کراچی میں سیکریٹری جنرل پی ایم اے ڈاکٹر قیصر سجاد نے پریس کانفرنس کرتے ہوئے کہا کہ ہمیں یہ بتاتے ہوئے خوشی محسوس ہورہی ہے کہ ’روشنی کا سفر‘ پروجیکٹ کے تحت آنکھوں کی 500 سرجریز چینی ماہرِ امراض چشم کی جانب سے کی جائیں گی۔
انہوں نے بتایا کہ یہ سرجریز نارتھ کراچی میں موجود پاکستان آئی بینک سوسائٹی (پی ای بی ایس) میں 10 سے 24 جنوری کے دوران کی جائیں گی۔
مزید پڑھیں: آنکھیں سرخ کیوں ہوجاتی ہیں اور ان کا علاج کیا ہے؟
اس اقدام سے دونوں ممالک کی میڈیکل ایسوسی ایشن کے درمیان تعاون سے پاک چین میڈیکل راہداری کے تعلقات میں مزید بہتری آئے گی۔
پریس کانفرنس میں پی ایم اے کے صدر ڈاکٹر شوکت ملک نے کہا کہ یہ سرگرمی دونوں ممالک کے درمیان بہتر تعلقات کو فروغ دے گی۔
انہوں نے پریس کانفرنس کے دوران بتایا کہ اس حوالے سے انٹرنیشنل ہیلتھ ایکسچینج اینڈ کوآپریشن چائنا (آئی ایچ ای سی سی) کے چار رکنی وفد نے ڈپٹی ڈائریکٹر ہومی چی کی سربراہی میں پی ای بی ایس کا دورہ کیا اور انتظامات کو حتمی شکل دی۔
انہوں نے بتایا کہ اس حوالے سے آئی ایچ ای سی سی اور پی ایم اے کے درمیان مفاہمت کی یاد داشت پر بھی دستخط کیے گئے۔
یہ بھی پڑھیں: آنکھوں کو محفوظ اور خوبصورت بنانے کے 7 طریقہ
ڈاکٹر قیصر سجاد نے بتایا کہ چینی وفد نے کہا کہ وہ اس مفت آئی کیمپ کے تمام اخراجات برداشت کرے گا اور یہ کیمپ چین کی جانب سے پاکستان کے غریب اور ضرورت مند مریضوں کے لیے تحفہ ہوگا۔
چینی وفد کی سربراہ ہو می شی نے کہا کہ یہ ایک بہترین موقع ہے جس سے دونوں ممالک کے ڈاکٹروں کو امرض چشم کے شعبہ میں اپنی صلاحیتوں کے مظاہرہ کرنے کا موقع ملے گا۔
اس موقع پر ڈاکٹر واسق نے امید ظاہر کی اس طرح کی سرگرمی کی طبی شعبے کے دیگر لوگ بھی پیروی کریں گے۔
یہ خبر 9 نومبر 2017 کو ڈان اخبار میں شائع ہوئی
لائیو ٹی وی