بارسلونا میں کیٹلونیا کی علیحدگی کے خلاف مظاہرے
کیٹلونیا کے شہر بارسلونا میں اسپین کے حق میں اور کیٹلونیا کی علیحدگی کے اعلان کے خلاف مظاہرے کا انعقاد کیا گیا جن میں ہزاروں افراد نے شرکت کی۔
خیال رہے کہ یکم اکتوبر کو کیٹلونیا میں ہونے والے آزادی کے حق میں ریفرنڈم میں ووٹ ڈالنے والوں پر پولیس کی جانب تشدد کیا گیا تھا جس کے نتیجے میں 337 افراد زخمی ہوگئے تھے۔
بعد ازاں کیٹلونیا کی 135 نشستوں پر مشتمل پارلیمنٹ میں 70 ووٹ سے کیٹلونیا کی آزادی کی قرارداد منظور کی گئی تھی جس کے بعد کیٹلونیا حکومت نے علیحدگی کا اعلان کردیا تھا۔
اس علیحدگی کے اگلے ہی روز اسپین کی حکومت نے آئین کے آرٹیکل 155 کے تحت کیٹلونیا پر دوبارہ سے کنٹرول حاصل کرلیا تھا، اس آئین کے مطابق حکومت کو باغی بننے والے علاقوں کو لگام دینے کا اختیار حاصل ہے۔
خیال یہ کیا جارہا ہے کہ سڑکوں پرمزاحمت کے عمل کا آغاز ہونے والا ہے جس کے نتیجے میں ہڑتالیں بھی ہوں گی۔
