کرم ایجنسی: مشتبہ امریکی ڈرون حملے میں 5 افراد ہلاک
وفاق کے زیر انتظام فاٹا کی کرم ایجنسی میں امریکا کے مشتبہ ڈرون حملے میں 5 افراد ہلاک ہوگئے۔
غیر ملکی خبر رساں ایجنسی ’اے ایف پی‘ کے مطابق حکام کا کہنا تھا کہ افغان سرحد کے قریب کرم ایجنسی کے ایک کمپاؤنڈ پر کم از کم 4 میزائل داغے گئے۔
انٹیلی جنس عہدیدار نے ’اے ایف پی‘ کو بتایا کہ ’دہشت گردوں کے مشتبہ گھر پر ڈرون حملے میں 5 افراد ہلاک ہوئے۔‘
مقامی انتظامیہ کے عہدیدار نے بھی ہلاکتوں کی تعداد کی تصدیق کی۔
مشتبہ ڈرون حملہ پاک فوج کی جانب سے غیر ملکی یرغمالیوں کو دہشت گرد تنظیم کی حراست سے بحفاظت بازیاب کرانے کے چند روز بعد پیش آیا۔
ایک عہدیدار نے دعویٰ کیا کہ ڈرون حملے کا ہدف حقانی نیٹ ورک کا کمانڈر ابوبکر تھا۔
ستمبر میں بھی کرم ایجنسی میں امریکی ڈرون حملے میں 3 افراد ہلاک اور 2 زخمی ہوئے تھے۔
امریکی صدر ڈونلڈ ٹرمپ کی جانب سے اگست میں پاکستان پر دہشت گردوں کو پناہ دینے کے الزام کے بعد یہ دوسرا ڈرون حملہ ہے۔
لائیو ٹی وی