ابوظہبی میں پہلی شکست
سری لنکا نے رنگنا ہیراتھ کی تباہ کن باؤلنگ کی بدولت پاکستان کو پہلے ٹیسٹ میچ میں 21 رنز سے شکست دے کر دو میچوں کی سیریز میں 1-0 کی برتری حاصل کر لی۔
سری لنکا نے پہلی اننگز میں دنیش چندیمل کے ناقابل شکست 155 رنز کی بدولت 419 رنز بنائے جس کے جواب میں پاکستان نے پہلی اننگز میں 422 رنز بنائے جس میں حارث سہیل کے 76 اور اظہر علی کے 85 رنز شامل تھے۔
دوسری اننگز میں سری لنکن ٹیم یاسر شاہ کی عمدہ باؤلنگ کے سامنے بے بس نظر آئی اور پوری ٹیم 138 رنز پر ڈھیر ہو گئی، پاکستانی اسپنر نے پانچ وکٹیں لیں۔
پاکستان کو فتح کیلئے 136 رنز کا ہدف ملا لیکن آسان ہدف کے تعاقب میں یونس خان اور مصباح الحق کی خدمات سے محروم ناتجربہ کار پاکستانی بیٹنگ لائن رنگنا ہیراتھ کے سامنے خزاں رسیدہ پتوں کی مانند بکھر گئی اور غیر ذمے دارانہ بیٹنگ کے سبب پوری ٹیم 114 رنز پر پویلین لوٹ گئی۔
سری لنکا کی جانب سے رنگنا ہیراتھ نے دوسری اننگز میں چھ پاکستانی کھلاڑیوں کو آؤٹ کرنے کے ساتھ ساتھ میچ میں مجموعی طور پر 11 وکٹیں حاصل کیں اور ٹیسٹ کرکٹ میں 400 وکٹیں لینے کا اعزاز بھی حاصل کر لیا۔
ہیراتھ کو فتح گر باؤلنگ پر میچ کا بہترین کھلاڑی قرار دیا گیا۔
