چمن میں دھماکا، ایف سی اہلکار شہید
چمن: صوبہ بلوچستان میں افغان سرحد کے قریب چمن کے علاقے تالاب میں ہونے والے دھماکے میں فرنٹیئر کورپس (ایف سی) کا ایک اہلکار شہید ہوگیا۔
سیکیورٹی ذرائع کے مطابق دہشت گردوں کا نشانہ تالاب چیک پوسٹ تھی۔
دھماکے کے نتیجے میں چیک پوسٹ کو نقصان پہنچا جبکہ ایک ایف سی اہلکار شہید ہوگیا، شہید اہلکار کی لاش کو سول ہسپتال چمن منتقل کردیا گیا۔
دھماکے کے بعد سیکیورٹی فورسز نے جائے وقوع کو گھیرے میں لے کر تحقیقات کا آغاز کردیا۔
واضح رہے کہ فوری طور پر دھماکے کی نوعیت کا تعین نہیں کیا جاسکا تاہم سیکیورٹی ذرائع کے مطابق دھماکا خودکش ہوسکتا ہے۔
مزید پڑھیں: چمن میں دھماکا، ڈی پی او سمیت 2 شہید
یاد رہے کہ رواں ماہ 10 جولائی کو بھی چمن میں ڈسٹرکٹ پولیس افسر (ڈی پی او) قلعہ عبداللہ ساجد خان مہمند کی گاڑی کے قریب خود کش دھماکے کے نتیجے میں ڈی پی او سمیت 2 افراد شہید اور متعدد پولیس اہلکاروں سمیت 11 افراد زخمی ہوگئے تھے۔
بلوچستان میں متعدد کالعدم گروپ اور علیحدگی پسند بلوچ تنظیمیں سیکیورٹی فورسز اور عام شہریوں کے خلاف مسلح کارروائیوں میں مصروف ہیں، ان کارروائیوں میں سیکڑوں لیویز، ایف سی اور پولیس اہلکار شہید ہوچکے ہیں۔
یہ بھی پڑھیں: چمن:افغان فورسز کاایف سی اہلکاروں پر حملہ، 12 افراد جاں بحق
صوبائی انتظامیہ نے دہشت گرد گروپوں کے خلاف آپریشنز اور کارروائیوں کا آغاز کررکھا ہے جس کے نتیجے میں سیکڑوں کی تعداد میں دہشت گردوں کو ہلاک اور گرفتار کرنے کا دعویٰ کیا جاچکا ہے۔
یہ بھی یاد رہے کہ صوبائی انتظامیہ نے متعدد مرتبہ اس بات کا دعویٰ کیا ہے کہ بلوچستان میں ہونے والی دہشت گردی کی کارروائیوں میں ہندوستان کی خفیہ ایجنسی 'را' ملوث ہے۔
لائیو ٹی وی