مریم نواز کی جے آئی ٹی کے سامنے پیشی
وزیراعظم کی صاحبزادی مریم نواز پاناماکیس کی تفتیش کے لیے سپریم کورٹ کی جانب سے تشکیل دی گئی جوائنٹ انوسٹی گیشن (جے آئی ٹی) کے سامنے پیش ہوئیں اور کہا کہ آج وہ قرض بھی اتار دیے جو واجب نہیں تھے۔
جوڈیشل اکیڈمی کے باہر میڈیا سے گفتگو کرتے ہوئے انھوں نے کہا کہ میرا نام سپریم کورٹ کے حکم نامے میں شامل نہیں تھا اس کے باوجود میں ملک کے آئین و قانون کی پاسداری کے لیے یہاں آئیں ہوں۔
ان کا کہنا تھا کہ وہ مسلم لیگ نواز کے کارکنان، میڈیا اور عوام کی شکرگزار ہیں جو انھیں اس گرمی کے باوجود سننے کے لیے یہاں موجود رہے۔
مریم نواز نے کہا کہ مجھے لاتعداد پیغامات اور دعائیں موصول ہوئیں، اظہار یکجہتی کا یہ جذبہ ہمیشہ یاد رہے گا۔
انھوں نے دعویٰ کیا کہ مخالفین مجھ پر کوئی بھی الزام ثابت نہیں کرسکے، دنیاکی پہلی جے آئی ٹی ہے جو الزام تلاش کررہی ہے۔
ان کا کہنا تھا کہ مجھ سے جے آئی ٹی نے میرے مرحوم دادا کے کاروبار کے حوالے سے سوالات کیے، تمام تحقیقات خاندانی کاروبار کے گرد گھوم رہی ہے، ذاتی کاروبار کا سوال بنتا ہے نہ جواب دینا۔
مجھے آج یہاں آکر معلوم ہوا ہے کہ ان کے پاس کچھ بھی نہیں، جے آئی ٹی بناکر الزامات تلاش کیے جارہے ہیں۔
