فٹبال اسٹار میسی شادی کے بندھن میں بندھ گئے
ارجنٹینا کے فٹبال اسٹار لیونل میسی اپنی بچپن کی دوست انٹونیلا روکوزو کے ساتھ شادی کے بندھن میں بندھ گئے۔
مقامی میڈیا میں میسی کی شادی کو 'ویڈنگ آف دی سینچری' قرار دیا گیا، میسی کے آبائی علاقے روساریو میں جمعہ (30 جون) کو منعقد ہونے والی تقریب میں جوڑے کے دونوں بچوں سمیت اسپورٹس اور شوبز کی معروف شخصیات نے شرکت کی۔
بعدازاں جوڑے نے میڈیا کے لیے ریڈ کارپٹ پر واک کی، میسی نے سیاہ سوٹ جبکہ ان کی اہلیہ نے سفید رنگ کا خوبصورت گاؤن زیب تن رکھا تھا۔
شادی کی تقریب میں تقریباً 260 کے قریب مہمانوں نے شرکت کی، جس میں جوڑے کے بچے 4 سالہ تھیاگو اور ایک سالہ میٹیو بھی موجود تھے، دیگر مہمانوں میں گلوکارہ شکیرا، ان کے شوہر اور نیمار اور لوئس سواریز سمیت متعدد فٹبالرز بھی شریک تھے۔
شادی کی تقریب کے موقع پر سیکیورٹی کے انتہائی سخت انتظامات کیے گئے تھے جبکہ تقریب کی منتظم کمپنی نے اپنے بیان میں پہلے ہی خبردار کردیا تھا کہ تقریب 'انتہائی ذاتی' ہوگی۔
اس موقع پر ٹی وی چینلز کے کیمرے اور صحافیوں کی بڑی تعداد موجود تھی، جو جوڑے کی محض ایک جھلک کو کیمرے کی آنکھ میں قید کرنے کے لیے بے تاب تھے۔
میسی اور انٹونیلا روکوزو بچپن میں پہلی مرتبہ روساریو میں ہی ملے تھے، جس کے بعد میسی 13 برس کی عمر میں اسپین منتقل ہوگئے، تاہم ان دونوں کے درمیان رابطہ برقرار رہا اور اب دونوں رشتہ ازدواج میں منسلک ہوچکے ہیں۔
لائیو ٹی وی