اسلام آباد: وفاقی وزیر داخلہ چوہدری نثار علی خان نے سیکیورٹی کلیئرنس کے بغیر 6 ہندوستانی شہریوں کی بدین ایئربیس آمد کا نوٹس لے لیا۔

سیکیورٹی اداروں کی جانب سے وزیر داخلہ کو موصول ہونے والی معلومات کے مطابق ہندوستانی شہری، پاکستان میں شکار کے لیے متحدہ عرب امارات سے آنے والے معزز مہمانوں کی پیشگی ٹیم کے طور پر بدین آئے۔

جس کے بعد چوہدری نثار نے شکار کی غرض سے پاکستان آنے والے غیر ملکی مہمانوں کے لیے قواعد و قوانین سے متعلق سندھ حکومت کی غفلت کا نوٹس لے لیا۔

مزید پڑھیں:نایاب پرندوں کا شکار: قطری خاندان چولستان پہنچ گیا

سیکیورٹی اداروں نے وزیر داخلہ کو بتایا کہ پیشگی ٹیم 6 ہندوستانی شہریوں پر مشتمل ہے جو بدین ایئر بیس پہنچی اور اس کے بعد ٹھٹھہ روانہ ہوئی۔

وزارت داخلہ کی جانب سے جاری ہونے والے بیان کے مطابق وزارت نے صوبائی حکومت اور بیرون ممالک پاکستانی مشن کو خط لکھ کر ہدایات جاری کی ہیں کہ وہ شکار کے قوانین کو اس کی پوری روح کے مطابق نافذ کروائیں۔

یہ بھی پڑھیں:تلور کا شکار: بحرین کے بادشاہ کیلئے اجازت نامہ

خط کے مطابق 'اس بات کو یقینی بنایا جائے کہ شاہی خاندان کے ساتھ آنے والا غیر ملکی عملہ پاکستانی ویزے کے حصول کے لیے قوانین پر عمل کرے'۔

مزید کہا گیا کہ 'اس بات کو بھی یقینی بنایا جائے کہ مہمانوں کے ساتھ بیرون ملک سے آنے والا عملہ چھوٹے ایئربیسز کے بجائے ملک کے بڑے ایئرپورٹس کے ذریعے ہی پاکستان میں داخل ہو'۔

یہ خبر 5 جنوری 2017 کے ڈان اخبار میں شائع ہوئی