'خانز کی فہرست میں فواد خان کا نام بھی شامل کرلو'
بولی وڈ اداکارہ ٹوئنکل کھنہ پہلی مرتبہ ہندوستان کے مقبول ٹاک شو 'کافی ود کرن' کا حصہ بنیں، جہاں انہوں نے شو کے میزبان کرن جوہر کو بھی اپنی حاضر جوابی سے خاموش کردیا۔
ٹوئنکل اس شو میں اپنے شوہر 49 سالہ اداکار اکشے کمار کے ہمراہ شریک ہوئیں، اس دوران ریپڈ فائر راؤنڈ میں کرن جوہر نے ٹوئنکل سے سوال کیا کہ بولی وڈ کے تین خانز عامر، شاہ رخ اور سلمان میں ان کا پسندیدہ کون ہے؟
اس سوال پر ٹوئنکل نے کرن کا مذاق اڑاتے ہوئے کہا کہ 'اس سوال میں ایک اور خان، فواد خان کا نام شامل کردو، اور پھر جواب دو'۔
مزید پڑھیں: 'تمباکو نوشی چھوڑنے والا خان ہی کامیاب رہے گا'
یہ سن کر کرن جوہر بالکل خاموش ہوگئے جبکہ اکشے کمار صرف مسکراتے نظر آئے۔
واضح رہے کہ پاکستانی اداکار فواد خان، بولی وڈ میں اپنے کیریئر کا آغاز ششانکا گھوش کی ہدایات میں بننے والی فلم 'خوبصورت' سے کیا، جس کے بعد انہوں نے کرن جوہر کی دو فلموں 'کپور اینڈ سنز' اور 'اے دل ہے مشکل' میں کام کیا۔
فواد خان ایک کے بعد ایک بہترین کردار کے باعث کرن جوہر کے پسندیدہ اداکار بن چکے تھے تاہم پاکستان اور ہندوستان کے درمیان جاری کشیدگی کے باعث کرن جوہر نے فواد خان کے ساتھ مزید کام نہ کرنے کا اعلان کیا تھا۔
ٹوئنکل کھنہ اور کرن جوہر بچپن کے دوست ہیں، جنہوں نے ایک ہی اسکول سے تعلیم حاصل کی، شو کے دوران کرن نے یہ بھی کہا کہ وہ ٹوئنکل سے محبت کرتے تھے، انہوں نے بتایا کہ اپنی ہہلی ڈائیریکشن فلم 'کچھ کچھ ہوتا ہے' میں ٹینا کا کردار کرن نے ٹوئنکل کے لیے تحریر کیا تھا، تاہم ٹوئنکل نے اس سے معذرت کرلی، جس کے بعد رانی مکھرجی نے یہ کردار ادا کیا۔
یہ بھی پڑھیں: ’زندگی میں صرف ٹوئنکل سے محبت ہوئی‘
اپنی شادی کے حوالے سے ٹوئنکل نے بتایا کہ اکشے کمار نے انہیں شادی کی پیشکش کی تاہم اس دوران وہ اپنے کیریئر کو لے کر سنجیدہ تھیں، انہوں نے اکشے کے آگے شرط رکھی کے اگر ان کی فلم 'میلہ' ہٹ ہوئی تو وہ ان سے شادی نہیں کریں گی، تاہم اگر فلم فلاپ ہوئی تو وہ شادی کے لیے راضی ہوجائیں گی۔
ٹوئنکل کی فلم 'میلہ' باکس آفس پر بری طرح فلاپ ہوئی تھی، جس کے بعد انہوں نے بولی وڈ کو خیرباد بھی کہہ دیا، ٹوئنکل کے مطابق انہیں اداکاری نہیں آتی، اس لیے وہ مزید اس فیلڈ کا حصہ نہیں رہیں۔
اکشے کمار اور ٹوئنکل کھنہ نے 2001 میں شادی کی، جس سے ان کے دو بچے ہیں۔
لائیو ٹی وی