بولی وڈ ڈائریکٹر انوگراگ کشیپ نے پاکستانی فنکاروں کے کام کے باعث مشکلات کی زد میں آنے والے ڈائریکٹرز کی مدد کے لیے بھارتی وزیراعظم نریندرا مودی کو تنقدی کا نشانہ بنایا ہے۔

انوراگ کشیپ جو پہلے بھی کافی تنازعات کا حصہ رہ چکے ہیں، نے نریندرا مودی کو تنقید کا نشانہ بناتے ہوئے دریافت کیا ہے کہ فواد خان کو اپنی فلم 'اے دل ہے مشکل' میں لینے کے باعث ممکنہ پابندی کا سامنا کرنے والے کرن جوہر کو مشکل کا سامنا کیوں ہے، جبکہ بھارتی وزیراعظم نے خود اس وقت پاکستان جاکر اپنے پاکستانی ہم منصب نواز شریف سے ملاقات کی، جب بھارت میں اے دل ہے مشکل کی شوٹنگ جاری تھی۔

انوراگ کشیپ نے ٹوئٹر پیغامات کے ذریعے اس دوغلے معیار کی شکایت کی۔

انہوں نے اپنے ایک پیغام میں لکھا 'نریندرا مودی، سر آپ نے 2 دسمبر کو پاکستانی وزیراعظم سے ملاقات پر معافی نہیں مانگی، اس وقت جب کرن جوہر اپنی فلم کی شوٹنگ کررہے تھے؟ کیوں؟

خیال رہے کہ اڑی حملے کے بعد بھارت میں پاکستانی فنکاروں پر پابندی عائد کردی گئی تھی تاہم انڈین پروڈیوسرز ایسوسی ایشن نے کہا تھا کہ جن فلموں میں پاکستانی اسٹار اس وقت کام کررہے ہیں، ان پر اس پابندی کا اطلاق نہیں ہوگا۔

مگر بھارتی سینماﺅں کے مالکان نے ان فلموں کے بائیکاٹ کا اعلان کیا ہے جن میں پاکستانی فنکار موجود ہوں گے اور کرن جوہر کی فلم کو سب سے زیادہ جھٹکا لگنے کا امکان ہے جو رواں ماہ کے آخر میں ریلیز ہورہی ہے۔