لاہور: پاکستان عوامی تحریک کے سربراہ علامہ ڈاکٹر طاہرالقادری لندن روانہ ہوگئے، ان کا کہنا ہے کہ وہ سانحہ ماڈل ٹاؤن کامعاملہ یورپی یونین میں اٹھائیں گے۔

پاکستان عوامی تحریک کے قائد ڈاکٹر طاہر القادری نے سانحہ ماڈل ٹاؤن کے ماثرین کو انصاف دلانے کے لیے ’تحریک قصاص‘ کا آغاز کیا تھا تاہم اسے ادھورا چھوڑ کہ انہوں نے ملک سے باہر جانے کا فیصلہ کرلیا۔

طاہر القادری لاہورسے لندن کے لیے روانہ ہوئےجہاں وہ سانحہ ماڈل ٹاؤن کے معاملے کو بین الاقوامی فورم پراٹھانے کیلئے وکلاسے مشاورت کریں گے۔

یہ بھی پڑھیں:سانحہ ماڈل ٹاؤن: ایک سال مکمل، ذمہ دار کون؟

عوامی تحریک کے سربراہ طاہر القادری کا کہنا تھا کہ جب کشمیرکامعاملہ اقوام متحدہ میں جاسکتاہے تو ماڈل ٹاؤن کی فریاد بھی یورپی یونین میں کی جاسکتی ہے۔

طاہر القادری کا یہ بھی کہنا تھا کہ تحریک قصاص سانحہ ماڈل ٹاون کے متاثرین کو انصاف دلانے کیلئے شروع کی گئی جس کے دوسرے اور تیسرے مرحلے کا آغاز مشاورت سے کیاجائے گا۔

ایک سوال پرڈاکٹرطاہرالقادری کا کہنا تھا کہ رائے ونڈ جانے کا آپشن ختم نہیں کیا، جاتی امراء کواسٹاپ نہیں بلکہ منزل بنائیں گے۔

یاد رہے کہ 17 جون 2014 کو لاہور کے علاقے ماڈل ٹاون میں تحریک منہاج القران کے مرکزی سیکریٹریٹ اور پاکستانی عوامی تحریک (پی اے ٹی) کے سربراہ ڈاکٹر طاہر القادری کی رہائش گاہ کے سامنے قائم تجاوزات کو ختم کرنے کے لیے آپریشن کیا گیا تھا، مگر پی اے ٹی کے کارکنوں کی مزاحمت اور پولیس آپریشن کے باعث 14 افراد ہلاک ہو گئے تھے جبکہ 90 کے قریب زخمی ہوئے تھے۔

اس واقعے کے بعد کارکنوں کو انصاف دلانے کے لیے طاہر القادری وطن واپس آگئے تھے اور انہوں نے اسلام آباد کی طرف لانگ مارچ بھی کیا تھا۔

مزید پڑھیں:عمران خان کا 24 ستمبر کو رائے ونڈ مارچ کا اعلان

ڈاکٹر طاہر القادری کے دھرنے کے نتیجے میں ماڈل ٹاون واقعہ کی ایف آئی آر درج ہوئی جس میں وزیراعظم نواز شریف ، وزیراعلی پنجاب شہباز شریف اور متعدد وزراء کو نامزد کیا گیا تھا۔

بعد ازاں حکومت نے جوڈیشل کمیشن تشکیل دیا لیکن رپورٹ نقص امن کے خدشے کے پیش نظر منظر عام پر نہ آ سکی۔

عوامی تحریک نے وزیراعلی پنجاب کی بنائی جوائنٹ انوسٹی گیشن ٹیم کا بائیکاٹ کرتے ہوئے اسے ماننے سے انکارکر دیا۔

جے آئی ٹی نے چند پولیس والوں کو قصور وار ٹھہراتے ہوئے ایف آئی آر میں نامزد تمام افراد کو بے گناہ قرار دیا گیا اور یوں پنجاب کی وزرات قانون کا قلم دان ایک بار پھر رانا ثنااللہ کےسپرد کردیاگیا۔

رواں برس ڈاکٹر طاہر القادری ایک بار پھر منظر عام پر آئے اور انہوں نے سانحہ ماڈل ٹاؤن کے متاثرین کو انصاف دلانے کے لیے تحریک قصاص شروع کرنے کا اعلان کیا۔

یہ بھی پڑھیں:طاہرالقادری کا ’رائے ونڈ مارچ‘ کا حصہ بننے سے انکار

اس موقع پر پاکستان تحریک انصاف (پی ٹی آئی) کے چیئرمین عمران خان نے بھی پاناما لیکس کی تحقیقات اور کرپشن کے خلاف ’تحریک احساب‘ شروع کرنے کا اعلان کررکھا تھا جبکہ شیخ رشید نے ’تحریک نجات‘ کا اعلان کیا تھا۔

عمران خان نے اعلان کیا تھا کہ وہ عید کے بعد رائے ونڈ کی جانب مارچ کریں گے تاہم ڈاکٹر طاہر القادری اور اہم اپوزیشن جماعتوں نے رائے ونڈ مارچ کا حصہ بننے سے انکار کردیا تھا۔