عیدالاضحیٰ،قربانی کے ساتھ خوشیاں دوبالا
عیدالاضحیٰ کے موقع پر ملک بھر میں نماز عید کے بڑے بڑے اجمتاعات ہوئے جہاں سیاسی اور سماجی اور مشہور شخصیات سمیت عوام نے شرکت کی اور ملک کی سربلندی اور عظمت کے لیے دعائیں مانگی گئیں۔
وزیراعظم نواز شریف نے نماز عید اپنے خاندان کے ساتھ رائیونڈ میں ادا کی جبکہ صدرممنون حسین حج کی ادائیگی کے لیے سعودی عرب میں موجود ہیں، قائم مقام صدر چیئرمین سینیٹ رضاربانی نے گورنرسندھ عشرت العباد کے ساتھ نماز عید کراچی میں ادا کی۔
چاروں صوبوں اورگلگت بلتستان کے وزراء اعلیٰ نے نماز عید اپنے آبائی علاقوں میں ادا کی اور آزاد کشمیر کے نئے وزیراعظم نے بھی نمازعید اپنے علاقے میں ادا کی۔
نماز عید کے بعد فرزندان اسلام نے اللہ کے برگزیدہ پیغمبر حضرت ابراہیم ؑ کی سنت پر عمل کرتے ہوئے جانوروں کی قربانی کی، کئی جگہ اونٹوں کی قربانی کی گئی۔
