اقوام متحدہ کی کشمیر میں فیکٹ فائنڈنگ مشن بھیجنے کی 'پیشکش'
اسلام آباد: اقوام متحدہ کے ہائی کمیشن برائے انسانی حقوق نے ہندوستان کے زیر انتظام کشمیر اور آزاد کشمیر میں اپنے فیکٹ فائنڈنگ مشن بھیجنے کی پیشکش کردی۔
دفتر خارجہ کی جانب سے جاری ہونے والے بیان میں کہا گیا ہے کہ 15 جولائی کو پاکستان نے اقوام متحدہ کے ہائی کمیشن برائے انسانی حقوق کو لکھے گئے خط میں مطالبہ کیا تھا کہ وہ 8 جولائی سے جموں و کشمیر میں ہونے والی انسانی حقوق کی خلاف ورزیوں کی تحقیقات کے لیے اپنے فیکٹ فائنڈنگ مشن کو وہاں بھیجے۔
بیان میں کہا گیا کہ 'جب سے مذکورہ درخواست دی گئی ہے وادئ کے حالات مزید خراب ہوگئے ہیں۔‘
دفتر خارجہ نے کہا کہ پاکستان کے مذکورہ مطالبے پر اقوام متحدہ کے ہائی کمشنر برائے انسانی حقوق نے جموں و کشمیر کی صورتحال کا نوٹس لیتے ہوئے 'فیکٹ فائنڈنگ مشن' کو کشمیر بھیجنے کی پیشکش کردی ہے۔
مزید پڑھیں: ’کشمیر ہندوستان کا اندرونی معاملہ نہیں‘
خیال رہے کہ جموں و کشمیر میں گذشتہ 41 روز میں نہتے کشمیری مظاہرین پر ہندوستانی فورسز کی فائرنگ سے 80 سے زائد افراد ہلاک اور 6000 سے زائد زخمی جبکہ 120 کے قریب کشمیری نوجوان بینائی سے محروم ہوچکے ہیں۔
مظاہروں کا آغاز حریت پسند کمانڈر برہان مظفر وانی کی ہلاکت کے بعد ہوا، جس کے بعد سے جموں و کشمیر میں مستقل طور پر کرفیو نافذ ہے اور کشمیری عوام کے بنیادی انسانی حقوق کی خلاف ورزیاں کی جارہی ہیں۔
دفتر خارجہ کا مزید کہنا تھا کہ جیسا کہ اقوام متحدہ کے ہائی کمشنر برائے انسانی حقوق اس بات سے واقف ہیں کہ آزاد کشمیر کا علاقہ کسی کیلئے بھی نو گو ایریا نہیں، جبکہ غیر ملکی سیاح اور پاکستان میں موجود دیگر ممالک کا سفارتی عملہ، جس میں اقوام متحدہ کے عملہ بھی شامل ہے، آزاد کشمیر میں آزادی سے سفر کر سکتا ہے۔
بیان میں یہ بھی واضح کیا گیا کہ اقوام متحدہ کے مبصرین نے حال ہی میں آزاد کشمیر میں ہونے والے انتخابات کا جائزہ لیا اور علاقے کے عوام سے ملاقاتیں بھی کیں تھیں۔
یہ بھی پڑھیں: آزادی تک 'موجودہ جدوجہد' جاری رکھنے کا عزم
دفتر خارجہ کا کہنا تھا کہ 'دوسری جانب ہندوستان نے اپنے زیر انتظام کشمیر میں اقوام متحدہ کی رسائی کو محدود کر رکھا ہے، جبکہ پاکستان نے کبھی بھی اقوام متحدہ کے حکام کو آزاد کشمیر میں سفر کرنے سے نہیں روکا'۔
دفتر خارجہ نے ایک مرتبہ پھر دہرایا کہ جموں و کشمیر میں جاری انسانی حقوق کی خلاف ورزیوں کا آزاد کشمیر کے حالات سے موازنہ قابل قبول نہیں اور اگر اقوام متحدہ کے انسانی حقوق کے کمشنر کی ٹیم آزاد کشمیر کا دورہ کرنا چاہے تو اس کا خیر مقدم کیا جائے گا۔
لائیو ٹی وی