پابندی میں نرمی: ہزاروں افغان گاڑیاں پاکستان میں داخل
لنڈی کوتل: پاکستانی حکام کی جانب سے سفری دستاویزات کے بغیر سفر کی پابندی میں نرمی کے بعد افغانستان سے ہزاروں گاڑیاں پاکستان میں داخل ہو گئیں۔
خیال رہے کہ یکم جون کو پاک افغان طورخم بارڈر پر سرحدی انتظام کا نیا نظام فعال کیا گیا تھا جس کے بعد کسی بھی شخص کو بغیر سفری دستاویزات سرحد پار آمد و رفت کی اجازت نہیں ہوگی۔
پاکستانی حکام نے بتایا کہ جلال آباد میں موجود پاکستانی قونصل جنرل کی جانب سے عارضی طور پر افغانستان سے ٹرانسپورٹرز کو رجسٹرڈ تجارتی مال گاڑیاں پاکستان میں لانے کی اجازت دی گئی تھی۔
اس حوالے سے افغان ٹرانسپورٹرز یونین کے حاجی قاسم عرب نے ڈان کو بتایا کہ افغانستان سے ملحقہ علاقے طورخم میں ہزاروں گاڑیاں، ڈرائیورز کے پاس سفری دستاویزات نہ ہونے کی وجہ سے پھنسی ہوئی تھیں۔
مزید پڑھیں: پاک افغان سرحد پر آمد و رفت کا نیا نظام فعال
انہوں نے کہا کہ افغان سیکیورٹی فورسز نے سبزیوں، پھلوں، کوئلہ، صابن اور پتھروں سے بھری ہوئی گاڑیاں روک لی تھیں کیونکہ ان ڈرائیورز کو سفری دستاویزات کے بغیر پاکستان میں داخل ہونے کی اجازت نہیں تھی لیکن پاکستانی قونصل جنرل نے عارضی طور پر اس پابندی میں نرمی کرتے ہوئے انھیں پاکستان میں داخل ہونے کی اجازت دی۔
پاکستان ٹرانسپورٹرز ایسوسی ایشن کے چیئرمین حاجی عظیم اللہ کا کہنا ہے کہ دونوں طرف کے مقامی سیاسی منتظمین اور ملٹری افسران نے ان گاڑیوں کو پاکستان میں داخل ہونے کی اجازت دینے کی درخواست کی تھی تاکہ تازہ سبزیوں، پھل و دیگر اشیاء کو ضائع ہونے سے بچایا جاسکیں۔
واضح رہے کہ پاک افغان طورخم بارڈر پر سرحدی انتظام کا نیا نظام فعال ہونے کے بعد مال بردار گاڑیوں کو سنگین مسائل کا سامنا کرنا پڑا اور تقریباً 300 سے زائد گاڑیاں جمعے کی نماز کے بعد افغان بارڈر پر پھسنی ہوئی تھیں۔
یہ بھی پڑھیں: سرحدعبورکرنے کا انتظام 'افغان حکام کے حوالے'
دوسری جانب پاکستانی حکام نے بتایا کہ 1200 افغان شہریوں کو یکم جون سے پاکستان میں روزانہ کی بنیاد داخل ہونے کے لیے ویزے جاری کیے گئے ہیں۔
تاہم حکام نے ان خدشات کا بھی اظہار کیا ہے کہ ان پابندیوں کی وجہ سے پاسپورٹ اور ویزا نہ رکھنے والے افغان شہریوں کی دیگر مقامات سے سرحد پار کرنے کی حوصلہ افزائی ہوگی۔
ذرائع کے مطابق پچھلے دو دن سے ہزاروں کی تعداد میں افغانیوں کو پاکستان میں داخل ہوتے ہوئے دیکھا گیا ہے۔
یہ خبر 4جون 2016 کو ڈان اخبار میں شائع ہوئی
آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔
لائیو ٹی وی