27 مارچ 2016 کا سورج زندہ دلوں کے شہر لاہور کے لیے تباہی کا پیغام لے کر آیا، جب گلشن اقبال پارک میں ایک خود کش دھماکے نے بہت سی زندگیوں کے چراغ بجھا دیئے۔

اقبال ٹاؤن میں واقع پارک میں خودکش حملے کے نتیجے میں 70 سے زائد افراد ہلاک جبکہ 250 سے زائد زخمی ہوئے۔

یہ دھماکا پارک کے اُس حصے میں ہوا جہاں بچوں کے جھولے نصب تھے، دھماکے کے نتیجے میں مرد و خواتین سمیت 25 بچے بھی جان کی بازی ہار گئے۔

خودکش دھماکے کے فوری بعد شہریوں نے اپنی مدد آپ کے تحت امدادی کاموں کا آغاز کرتے ہوئے لاشوں اور زخمیوں کو ہسپتال منتقل کیا جبکہ شہر کے تمام ہسپتالوں میں ایمرجنسی نافذ کردی گئی۔

دوسری جانب پولیس نے بھی جائے وقوع کو گھیرے میں لے کر شواہد جمع کرنے کے بعد تحقیقات کا آغاز کر دیا۔