پاکستانی اداکار فواد خان کی بولی وڈ میں دوسری فلم ’کپور اینڈ سنز‘ نے صرف 4 روز میں 31 کروڑ ہندوستانی روپے سے زائد کما لیے ہیں۔

شکن بترا کی ہدایت میں بنی فلم میں فواد خان کے ہمراہ، سدھارتھ ملہوترا، عالیہ بھٹ، رشی کپور، رتنا پاٹھک، اور رجت کپور نے اہم کردار ادا کیے ہیں۔

مزید پڑھیں: کپور اینڈ سنز: فواد کا غیرمعیاری انتخاب

’کپور اینڈ سنز‘ پھلکی رومانوی، اور طنز و مزاح سے بھرپور ایک مڈل کلاس خاندان کے گھریلو مسائل کی عکاسی کرتی ہوئی فلم ہے جس میں فواد اور سدھارتھ نے بھائیوں کا کردار ادا کیا ہے۔

فلم کو شائقین کے ساتھ ساتھ ناقدین کی بھی بے حد داد وصول ہورہی ہے اور باکس آفس پر بھی فلم نے ریلیز کے چند ہی دنوں میں ایک بڑی کمائی حاصل کرلی ہے۔

بولی وڈ تجزیہ نگار ترن ادرش نے ٹوئٹر پر بتایا کہ فلم نے اپنے ریلیز کے صرف چار روز میں 31 کروڑ سے زائد کمائی کرلی اور فلم اب بھی باکس آفس پر مضبوطی سے آگے بڑھ رہی ہے۔

کرن جوہر کی پروڈکشن میں بنی فلم ’کپور اینڈ سنز‘ 18 مارچ کو سنیما گھروں میں پیش کی گئی تھی۔

فلم نے ریلیز کے پہلے روز 6 کروڑ 85 لاکھ روپے، ہفتے کو 7کروڑ 75 لاکھ روپے، اتوار کو 11 کروڑ 75 لاکھ روپے اور پیر کو 5 کروڑ 8 لاکھ روپے کمائے۔

واضح رہے کہ فواد خان کی بولی وڈ میں یہ دوسری فلم ہے، اس سے قبل 2014 میں ریلیز ہوئی ان کی ڈیبیو فلم ’خوبصورت‘ نے بھی اچھا ردعمل حاصل کیا۔

فلم میں فواد خان کے ہمراہ اداکارہ سونم کپور نے مرکزی کردار ادا کیا تھا۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔