حکومت-احتجاجی ملازمین میں مذاکرات بے نتیجہ ختم
کراچی: پاکستان انٹرنیشنل ایئر لائن (پی آئی اے) ملازمین کی جوائنٹ ایکشن کمیٹی نے حکومت سے مذاکرات میں کسی 'حتمی نتیجے' پر پہنچنے تک فلائٹ آپریشن بحال کرنے سے انکار کردیا۔
ڈان نیوز کے مطابق کیپٹن سہیل بلوچ کی سربراہی میں کمیٹی کے وفد نے چیئرمین نجکاری کمیشن اور وزیر نجکاری محمد زبیر سے کراچی میں ان کی رہائشگاہ پر ملاقات کی۔
مزید پڑھیں: 'بلاجواز ہڑتال' کے سامنے نہیں جھکیں گے: وزیراعظم
ملاقات کے بعد میڈیا سے گفتگو میں چیئرمین جوائنٹ ایکشن کمیٹی کا کہنا تھا کہ حکومت کے ساتھ بامعنی بات چیت ہوئی، امید ہے کل کسی مثبت نتیجے پر پہنچ جائیں گے تاہم حتمی نتیجے پر پہنچنے تک پی آئی اے کا آپریشن معطل رہے گا۔
انہوں نے کہا کہ چیئرمین نجکاری کمیشن کو اپنا نقطہ نظر سے آگاہ کردیا ہے۔
کیپٹن سہیل بلوچ کا کہنا تھا کہ ان کے چار ملازمین لاپتہ ہیں، حکومت سے درخواست ہے کہ انہیں بازیاب کرایا جائے۔
مزید پڑھیں: ہڑتالی ملازمین کو برطرف کردیا جائے گا، وزیراعظم
دوسری جانب محمد زبیر کا کہنا تھا کہ پی آئی اے کا فضائی آپریشن شروع ہوجائے تو ایکشن کمیٹی کے ساتھ بیٹھیں گے۔
خیال رہے کہ ملازمین کے احتجاج کے باعث گزشتہ چار روز سے قومی ایئرلائن کی فلائٹ سروس معطل ہے جبکہ ادارے کو اربوں روپے کا نقصان ہوچکا ہے۔
احتجاج کے پہلے روز کراچی میں نامعلوم سمت سے چلنے والی گولی کے باعث دو ملازمین بھی ہلاک ہوگئے تھے جس کے بعد ڈی جی رینجرز نے واقعے پر تحقیقاتی ٹیم تشکیل دی۔
وفاقی حکومت کا موقف ہے کہ 350 ارب روپے کے خسارے میں چلنے والے ادارے کو اس کی موجودہ انتظامیہ مزید نہیں چلاسکتی۔
حکومت نے عالمی مالیاتی ادارے (آئی ایم ایف) کو جون 2016 تک پی آئی اے کی نجکاری کرنے کی یقین دہانی کرا رکھی ہے۔
آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں.
لائیو ٹی وی
تبصرے (1) بند ہیں