کینسر کی 5 ابتدائی انتباہی علامات
کیا آپ کو کینسر ہے ؟ اگر کوئی یہ سوال پوچھے تو اس کا جواب آپ کیسے دیں گے ؟
یقیناً یہی کہ ہم کوئی ڈاکٹر تھوڑی ہے جو یہ بتاسکیں مگر کیا آپ کو معلوم ہے کہ 70 سے 80 فیصد افراد کینسر کا خطرہ ظاہر کرتی اہم علامات کو نظرانداز کردیتے ہیں۔
یہ بات برطانیہ میں ہونے والی تحقیق میں سامنے آئی۔
کینسر ریسرچ یوکے کی تحقیق میں بتایا گیا ہے کہ لوگ کینسر کی چھپی ہوئی علامات کو اس ڈر سے نظر انداز کردیتے ہیں کہ ڈاکٹر یا ان کا وقت ضائع نہ ہو۔
تحقیق میں کینسر کی ابتدائی انتباہی علامات کا ذکر بھی کیا گیا ہے جو یہ ہیں۔
مسلسل کھانسی یا گلے کا بیٹھ جانا، کوئی گلٹی، ہیضہ یا قبض۔
جسمانی وزن میں بغیر وجہ کے کمی یا ایسا زخم جو ٹھیک نہ ہورہا ہو۔
قے، پیشاب یا فضلے میں خون کا آنا، خواتین کے مخصوص ایام میں جریان خون۔
ٹوائلٹ جاکر حوائج کے دوران یہ احساس کہ پیٹ پوری طرح خالی نہیں ہوا۔
عجیب شکل کے مسے وغیرہ۔
تحقیق میں بتایا گیا ہے کہ 50 فیصد سے زائد برطانوی عوام کو کم از کم ایسی ایک انتباہی علامات جیسے مسلسل کھانسی، ایسا زخم جو ٹھیک نہ ہو یا گلٹی وغیرہ کا سامنا ہوتا ہے مگر صرف دو فیصد ہی خیال کرتے ہیں کہ ایسا کینسر کے باعث ہوسکتا ہے۔
محققین کے مطابق ہم لوگوں کو یہی مشورہ دے سکتے ہیں کہ اگر انہیں شبہ ہو تو بغیر کسی ڈر کے اپنا معائنہ کروائیں۔
ان کا کہنا تھا کہ اکثر یہ علامات کینسر کے باعث سامنے نہیں آتیں تاہم اگر آپ میں اس مرض کی جلد تشخیص ہوجائے تو علاج میں زیادہ آسانی ہوسکتی ہے۔
خیال رہے کہ آج دنیا بھر میں کینسر کا عالمی دن منایا جارہا ہے جس کا مقصد اس مرض کے علاج کو بہتر اور عوامی شعور کو اجاگر کرنا ہے جو ہر سال دنیا بھر میں کروڑوں افراد کو متاثر کرتا ہے۔
آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔
لائیو ٹی وی