2015 میں سیاحت کیلئے دس اہم ترین ممالک
قدرت کی خوبصورتی ہو یا بلند و بالا عمارات کا جادو، ٹیکنالوجی سے لیس شاپنگ پلازہ ہو یا تفریحی مقامات پر گھومنے پھرنے کا شوق کس فرد کو نہیں ہوتا تاہم اس کی استطاعت بہت کم لوگوں کو ہوتی ہے مگر پھر بھی جو لوگ آئندہ برس دنیا کے مختلف ممالک کی سیر کرنا چاہتے ہیں ان کے لیے دنیا کے دس اہم ترین ممالک کا انتخاب سامنے آگیا ہے۔
ان ممالک کو سیاحت کے لیے معروف ادارے لونلی پلانیٹ نے آئندہ برس گھومنے پھرنے کے لیے سب سے بہترین مقامات قرار دیا ہے جہاں آپ ٹیکنالوجی، قدامت پسندی، فطری خوبصورتی، برف، سمندر، پہاڑی، جنگلی حیات غرض کہ ہر قسم کے نظاروں سے لطف اندوز ہوسکتے ہیں۔
سنگاپور
 |
اس فہرست میں سب سے اوپر ہے رقبے کے لحاظ سے دنیا کے چھوٹے ترین ممالک جبکہ معیشت کے لحاظ سے سرفہرست ملکوں میں سے ایک سنگاپور کو رکھا گیا ہے، جس کی آزادی کی گولڈن جوبلی 2015 میں منائی جانے والی ہے۔ یہاں کی تاریخی عمارات، سرسبز جگہیں اور شاپنگ سینٹرز سیاحوں کو اپنی جانب کھینچتے ہیں، مگر یہاں کی نیشنل آرٹ گیلری سمیت متعدد حیرت انگیز جگہیں بھی ہیں جو دیکھنے والوں کو دنگ کرکے رکھ دیتی ہیں — رائٹرز فوٹو
نمیبیا
 |
براعظم افریقہ کا ملک نمیبیا سیاحوں کے لیے دوسرا بہترین ملک قرار پایا ہے، یہاں کی معاشی ترقی کے ساتھ یہاں کی جنگلی حیات، صحرا اور دیگر مقامات کسی کے بھی ہوش اڑانے کے لیے کافی ہیں — وکی پیڈیا فوٹو
لتھوانیا
 |
یورپی ملک لتھوانیا آئندہ برس یورپی یونین میں جگہ بنانے میں کامیاب ہوگا جس سے وہاں سیاحت کے لیے جانا پہلے کے مقابلے میں زیادہ آسان ہو جائے گا، تاہم یہاں کے زبردست ساحل اور قدامت پسندی پر مبنی ولینیوس باروکے نامی ایک قصبہ بھی موجود ہے جو عالمی ثقافتی ورثے میں شامل ہے جو دیکھنے والوں کے لیے زندگی کا یادگار تجربہ ثابت ہوسکتا ہے — آن لائن فوٹو
نکارگوا
 |
شمالی امریکا کے اس ملک کا نام ہوسکتا ہے کہ بیشتر افراد نے سنا بھی نہ ہو مگر یہاں کے قدیم طرز کے قصبے، لوک روایات پر مشتمل جگہیں، جزیرے اور دیگر سب اسے ایک پُرکشش ملک بنا دیتے ہیں اور یہی وجہ ہے کہ سیاحت کے شوقین افراد کے لیے چوتھا اہم ملک قرار پایا ہے — بشکریہ وکی میڈیا کامنز
آئرلینڈ
 |
اگر تو آپ قدیم روایات سے محبت کرتے ہیں تو یہ ملک آپ کے لیے خوابوں کی جنت ثابت ہوگا، کیونکہ یہاں کے گھر قدامت جبکہ شاہراہیں جدت کے انوکھے امتزاج کو پیش کرتی ہیں، اس کے علاوہ یہاں کی موسیقی، رقص اور دیگر چیزیں لوگوں کے دلوں کی دھڑکنیں بڑھا دیتی ہیں — اے ایف پی فوٹو
کانگو
 |
جنگلی حیات کے شائقین کے لیے یہ مقام کسی پرستان سے کم نہیں، خاص طور پر یہاں کے گوریلے کسی کی بھی نیندیں اڑا سکتے ہیں جبکہ یہاں کے نیشنل پارکس میں آپ ہر طرح کے جانوروں کو دیکھ کر اپنا یہ شوق پورا کرسکتے ہیں — بشکریہ وکی میڈیا کامنز
سائبریا
 |
اگر آپ گرم موسم سے تنگ رہتے ہیں تو برف زار سائبریا آپ کی یہ شکایت دور کرنے کے لیے کافی ہے، یہاں کے برفانی میدان، پرانے گھر اور روایتی میلے سب اسے دیکھنے کے قابل جگہ بنا دیتے ہیں اور یہی وجہ ہے کہ آئندہ برس کے لیے ساتواں اہم ترین ملک قرار پایا ہے — رائٹرز فوٹو
فلپائن
 |
مونگوں کی چٹانوں، رنگ برنگے ساحلوں اور ہزاروں جزائر کا گھر فلپائن، جسے کسی بھی سیاح کے لیے نظر انداز کرنا ممکن ہی نہیں۔ یہاں کے انوکھے فیسٹیولز، موسیقی اور کثیرالنسلی ثقافت سب کسی کو بھی ایک لمحے کے لیے بھی بیزار ہونے نہیں دیتا — بشکریہ وکی میڈیا کامنز
سینٹ لوشیا
 |
اگر آپ جنگل سے بھری چٹان سے ساحل کا نظارہ کرنا چاہتے ہیں تو سینٹ لوشیا اس کے لیے سب سے خوبصورت ملک ثابت ہوسکتا ہے، مہم جوئی کے شوقین افراد یہاں کے آتش فشانی سلسلوں کو دیکھ کر اپنا شوق پورا کرسکتے ہیں تو فطرت کے شائقین ڈولفنز کے ساتھ تیراکی کا لطف حاصل کرسکتے ہیں اور سنسنی کے پرستاروں کے لیے پیٹون پہاڑیوں سے سمندر میں چھلانگ لگانے یا زیرآب مونگوں کی چٹانوں کو دیکھنا یادگار ترین تجربہ ثابت ہوسکتا ہے — بشکریہ ہفنگٹن پوسٹ
مراکش
 |
جدت و قدامت کا امتزاج مراکش جہاں عرب و افریقی ثقافت باہم مل کر اس ملک کو انوکھا بنا دیتے ہیں۔ یہاں کی موسیقی، ساحل اور لوگوں کا طرز زندگی سب اسے 2015 کے لیے سیاحت کا دسواں اہم ترین ملک بناتے ہیں — آن لائن فوٹو
تبصرے (12) بند ہیں