عمران خان اور نواز شریف ایک دوسرے کے جتنے بھی مخالف ہوں مگر ان میں ایک بات کم از کم ضرور مشترک ہے اور وہ یہ کہ دونوں مسلم دنیا کے بااثر ترین پانچ سو افراد کی تازہ ترین فہرست میں شامل ہیں۔

عمان کے تحقیقی ادارے رائل اسلامک اسٹریٹجک اسٹیڈیز سینٹر نے دنیا کی پانچ سو بااثر ترین مسلمان شخصیات کی فہرست شائع کی ہے جس میں سعودی فرماں روا شاہ عبداللہ سب سے بااثر مسلم شخصیت قرار پائے ہیں جبکہ مجموعی طور پر اس میں 32 پاکستانی شامل ہیں، جن میں سے دو سرفہرست پچاس شخصیات کا بھی حصہ ہیں۔

پاکستان کی جو شخصیت عالمی سطح پر سب سے بااثر قرار پائی ہے وہ تبلیغی جماعت کے سربراہ حاجی عبدالوہاب ہیں جو دسویں نمبر پر ہیں جبکہ معروف عالم دین مفتی تقی عثمانی انیسویں نمبر پر ہیں۔

ان کے علاوہ وزیراعظم نواز شریف، عاصمہ جہانگیر، ملالہ یوسفزئی، سراج الحق، ڈاکٹر عبدالقدیر خان، عبدالستار ایدھی اور مولانا فضل الرحمان سمیت 500 بااثر ترین مسلمان شخصیات کی فہرست میں عمران خان، ڈاکٹر عامر لیاقت حسین، مولانا طارق جمیل، ڈاکٹر طاہر القادری، ڈاکٹر ادیب رضوی، عابدہ پروین، ڈاکٹر اکبر احمد اور دیگر کے نام شامل ہیں۔