اسلام آباد : فیڈرل بورڈ آف ریونیو (ایف بی آر) نے پاکستان عوامی تحریک (پی اے ٹی) کے سربراہ ڈاکٹر طاہرالقادری اور ان کے ادارے منہاج القرآن کو 35 کروڑ روپے انکم ٹیکس ادائیگی کا نوٹس جاری کردیا۔

ڈان نیوز کے مطابق گزشتہ دو ڈھائی ماہ سے علامہ طاہر القادری اور ان کے ادارے کے اکاؤنٹس کی جانچ پڑتال کی جا رہی تھی، جس کے دوران آٹھ ایسے اکاؤنٹس کا علم ہوا جن میں 77 کروڑ روپے مختلف ذرائع سے آئے تھے۔

طاہر القادری کو اس حوالے سے متعدد نوٹسز بھیجے گئے تھے، لیکن انہوں نے یا اُن کے ادارے نے کوئی جواب نہیں دیا، جس کے بعد ایف بی آر نے انہیں اور ان کے ادارے کو پینتیس کروڑ روپے کے انکم ٹیکس کی ادائیگی کا نوٹس بھیجا ہے۔

نوٹس میں کہا گیا ہے کہ انکم ٹیکس آرڈیننس کے تحت یہ ٹیکس ادا کیا جائے جب کہ ادائیگی نہ کرنے کی صورت میں کارروائی کی جائے گی۔

نوٹس میں یہ بھی کہا گیا ہے کہ عدم ادائیگی کی صورت میں ان اکاؤنٹس کو منجمد کرکے ان کاؤنٹس سے بھی ریکوری کی جا سکتی ہے۔