پشتونخواملی عوامی پارٹی کے سربراہ محمود خان اچکزئی نے انتخابات میں مداخلت کو برداشت نہ کرنے کا عزم دہراتے ہوئے کہا ہے کہ بندوق کی بات کبھی نہیں کی بلکہ ہمیشہ جمہوریت اور آئین کی بات کی ہے۔

کوئٹہ میں انتخابی مہم کے سلسلے میں جلسے سے خطاب کرتے ہوئے محمود خان اچکزئی نے کہا کہ بھٹو کا ساتھ دینے پر لوگ طعنے دیتے تھے جبکہ بھٹوکو برا بھلا کہنے والے آج پیپلز پارٹی میں ہیں۔

یہ بھی پڑھیں:الیکشن کمیشن کا اُمیدواروں کی سیکیورٹی پر تحفظات کا اظہار

محمود خان اچکزئی کا کہنا تھا کہ مشکل سے مشکل وقت میں سیاست کی ہے اور یہ سلسلہ نہیں رکے گا تاہم دیوار سے لگا کر پارلیمانی سیاست کو خیر باد کہنے پر مجبور نہ کیا جائے۔

ان کا کہنا تھا کہ حکمران غلطیاں تسلیم کرکے ماضی کے غلط فیصلوں اور پالیسی پر نظر ثانی کریں۔

محمود خان اچکزئی کا کہنا تھا کہ پاکستان تار یخ کے خطرناک دور سے گزر رہاہے، ایف اے ٹی ایف کی جانب سے پاکستان کا نام گرے لسٹ میں شامل ہونے کے بعد جو پابندیاں لگنے والی ہیں وہ ہم برداشت نہیں کر پائیں گے۔