اسلام آباد: چیئرمین پاکستان تحریک انصاف پی ٹی آئی عمران خان نےبدھ کے روز کہا ہے کہ پی ٹی آئی برسر اقتدار آ کر ملک میں تعلیمی ایمرجنسی کا نفاز کریں گے۔

خبر رساں ادارے کے مطابق پی ٹی آئی  نے ملک میں تعلیمی ایمرجنسی کے نفازکے لیئے چھ نکاتی فارمولا پیش کیا ہے۔

تمام سرکاری اور پرائیویٹ  سکولوں میں یکساں نظام تعلیم اور نصاب رائج ہوگا اور تدریسی زبان انگریزی کے بجائے اردو ہو گی۔

تعلیم کا بجٹ دو اعشاریہ ایک  فیصد سے بڑھا کر پانچ فیصد مقرر کیا جائے گا اور ڈھائی کھرب روپے اس مد میں خرچ کئے جائینگے۔

انہوں نے کہا کہ پی ٹی آئی بدعنوان سیاستدانوں سے لوٹی ہوئی دولت واپس لے کر تعلیم کے شعبے پر خرچ کرے گی۔

عمران خان نے کہا کہ تحریک انصاف تعلیمی شعبے کو  اولیت دیتی ہے کیونکہ تعلیم سے ہی ملک کی بگڑتی ہوئی صورتحال کو بہتر بنایا جا سکتا ہے۔

انہوں نے کہا کی پی ٹی آئی مدارس کے طلباء کو عام اسکولوں کے طلباء کے ساتھ برابری کی سطح پر لانے کے لیئے بھر پور کوشش کرے گی۔

عمران خان نے کہا کی انگریزی ایک بین الااقوامی زبان ہے اسے نظر انداز نہیں کیا جا سکتا انگریزی مضمون کی حد تک تو ٹھیک ہے لیکن اسے ثقافت کے طور پر اپنانا ملک میں سماجی طبقہ بندی کا سبب بنے گا۔

پی ٹی آئی چیئرمین عمران خان نے اس عزم کا اظہار کیا کہ اقتدار میں آنے کے بعد پی ٹی آئی تمام تعلیمی اداروں کو سیاست سے پاک کرے گی اور تعلیمی نظام ڈسٹرکٹ اور سب ڈسٹرکٹ کی سطح پر ہو گا۔

انہوں نے کہا کہ  فاٹا اور بلوچستان کے بیشتر تعلیمی ادارے گذشتہ دس سالوں سے بند ہیں جس کی وجہ سے والدین اپنے بچوں کو پڑھا نہیں پا رہے ہیں جو فوری حل طلب مسئلہ ہے۔