صوبہ خیبر پختونخوا کے ضلع کوہاٹ میں پولیو کا کیس رپورٹ ہوا ہے جس سے رواں سال پاکستان میں رپورٹ ہونے والے پولیو کے کیسز کی تعداد 23 ہو گئی ہے۔

پولیو لیبارٹری کے مطابق کوہاٹ میں ایک 10 ماہ کی بچی کا بازو پولیو سے متاثر ہوا ہے۔

پاکستان پولیو اریڈیکیشن پروگرام کے مطابق سال 2024 میں اب تک خیبرپختونخوا میں پولیو کیسز کی تعداد 2 ہو گئی ہے۔

پروگرام کے مطابق پولیو وائرس کا تیزی سے پھیلاؤ بچوں کی صحت کے لیے مستقل خطرہ ہے اور بچوں کو پولیو ویکسین کے ساتھ ساتھ حفاظتی ٹیکہ جات کا کورس بھی بروقت مکمل کروائیں۔

واضح رہے کہ دو دن قبل بلوچستان کے ضلع پشین میں پولیو وائرس کا ایک اور کیس سامنے آیا تھا۔

بلوچستان کے ضلع پشین سے تعلق رکھنے والے 30 ماہ کے بچے میں کیس رپورٹ ہوا تھا اور نیشنل انسٹی ٹیوٹ آف ہیلتھ میں پولیو کے خاتمے کے لیے ریجنل ریفرنس لیبارٹری نے بلوچستان کے علاقے پشین سے تعلق رکھنے والے بچے میں وائلڈ پولیو وائرس ٹائپ ون )(ڈبلیو پی وی-1) کی موجودگی کی تصدیق کی تھی۔

۔