پاکستان تحریک انصاف(پی ٹی آئی) نے ایک بار پھر لاہورجلسے کے لیے ڈپٹی کمشنرکو نئی درخواست دے دی جس میں پانچ اکتوبر کو مینار پاکستان میں بانی پی ٹی آئی عمران خان کی سالگرہ کی تقریب اور جلسے کی اجازت طلب کی گئی ہے۔

ڈان نیوز کے مطابق ذرائع کے مطابق پی ٹی آئی سینٹرل پنجاب کے سنیئر نائب صدر اکمل خان باری نے ڈپٹی کمشنر لاہور آفس میں درخواست جمع کروادی جس میں کیا گیا ہے کہ تحریک انصاف لاہور کے مینار پاکستان گراؤنڈ میں جلسہ کرنا چاہتی ہے۔

درخواست میں کہا گیا کہ پانچ اکتوبر کو بانی پی ٹی کی سالگرہ کا دن ہے اس لیے اس دن جلسے کی اجازت دی جائے، ہم پانچ اکتوبر کو شام پانچ بجے سے لے کر رات 10 بجے تک جلسہ کرنا چاہتے ہیں۔

اس سلسلے میں استدعا کی گئی کہ مینار پاکستان جلسے کے تمام شرکا تمام قانونی ضابطوں پر مکمل عمل کریں گے اور وہاں اس سے قبل مولانا فضل الرحمٰن اور طاہر القادری بھی جلسہ کر چکے ہیں لہٰذا پاکستان تحریک انصاف کو بھی مینار پاکستان میں جلسے کی اجازت دی جائے۔

واضح رہے کہ پاکستان تحریک انصاف نے راولپنڈی میں بھی جلسے کے لیے انتظامیہ کو درخواست دی ہے۔

ذرائع کے مطابق پاکستان تحریک انصاف نے تمام بڑے شہروں میں جلسے کرنے کا فیصلہ کیا ہے اور راولپنڈی کے بعد لاہور اور میانوالی سمیت دیگر شہروں میں جلسے کرنے کا ارادہ ہے۔