عرفان قادر ایڈووکیٹ نے وزیر اعظم شہباز شریف کے معاون خصوصی کے عہدے سے استعفیٰ دے دیا۔

وہ معاون خصوصی برائے احتساب و داخلہ مقرر کیے گئے تھے اور ان کا عہدہ وفاقی وزیر کے برابر تھا۔

آج (29 مارچ کو) کابینہ ڈویژن سے جاری نوٹی فکیشن کے مطابق وزیراعظم نے عرفان قادر کا استعفیٰ قبول کرلیا۔

تاہم نوٹی فکیشن میں استعفیٰ دینے کی وجہ کا ذکر نہیں کیا گیا۔

مزید کے لیے کلک کریں

خیال رہے کہ 10 اکتوبر 2022 کو وزیراعظم شہباز شریف نے معاون خصوصی عرفان قادر کو احتساب اور داخلہ کا قلمدان سونپا تھا۔

اس ضمن میں کابینہ ڈویژن سے جاری نوٹی فکیشن کو 7 اکتوبر سے نافذالعمل قرار دیا گیا تھا۔

عرفان قادر مختلف عدالتوں میں مسلم لیگ (ن) کی قیادت کے متعدد اہم مقدمات کی پیروی کرچکے ہیں۔

اس کے علاوہ وہ 12 اپریل 2012 سے 7 جون 2013 تک اٹارنی جنرل فار پاکستان کے عہدے پر بھی فائز رہ چکے ہیں۔