کورونا وائرس: پنجاب میں کیسز 500 سے متجاوز، ملک میں تعداد 1500 ہوگئی
پاکستان میں کورونا وائرس کے نئے کیسز سامنے آنے کا سلسلہ نہ رک سکا اور ملک کے مختلف حصوں میں مزید متاثرہ افراد سامنے آنے سے مجموعی تعداد 1500 ہوگئی۔
اس مہلک وائرس سے خیبرپختونخوا میں ایک جبکہ گزشتہ روز پنجاب میں 2 اموات بھی سامنے آئیں جس کے بعد اب تک ملک میں وائرس سے جان کی بازی ہارنے والوں کی تعداد 12 ہوچکی ہے۔
اگرچہ اس وائرس سے سب سے زیادہ سندھ متاثر تھا تاہم گزشتہ روز پنجاب میں 82 کیسز سامنے آنے سے اب سب سے زیادہ متاثرین پنجاب سے ہیں۔
یہی نہیں بلکہ اب تک سب سے زیادہ اموات بھی پنجاب میں سامنے آئی ہیں جہاں 5 افراد اس عالمی وبا سے انتقال کرگئے جبکہ 4 افراد کا خیبر پختونخوا، ایک سندھ، ایک بلوچستان اور ایک گلگت بلتستان میں انتقال ہوا۔
ہفتے کو سامنے آنے والے اعداد و شمار پر نظر ڈالیں تو یہ متاثرین کی مجموعی تعداد 1500 ہو چکی ہے۔
سندھ
سندھ میں بھی کورونا وائرس کے مزید 29 کیسز رپورٹ ہوئے جس کے بعد صوبے میں تعداد 469 ہوگئی۔
محکمہ صحت سندھ کی جانب سے بتایاگیا کہ 17 نئے کیسز کراچی میں رپورٹ ہوئے جس کے بعد شہر قائد میں متاثرین 181 ہوگئے۔
اس کے علاوہ تین افراد حیدرآباد اور ایک دادو سےمتاثر ہوا ہے جبکہ 14 افراد صحتیاب ہوچکے ہیں۔
صوبائی محکمہ صحت کے مطابق اب تک ایک فرد کا انتقال ہوا ہے اور 170 زیر علاج ہیں، اس طرح زائرین کے سوا سندھ کے ان کیسز میں 131 مقامی سطح پر منتقلی کے ہیں۔
مزید برآں محکمہ صحت نے بتایا کہ سکھر سے ایران آنے والے 265 اور لاڑکانہ آنے والے 7 زائرین میں کورونا کا ٹیسٹ مثبت آیا ہے۔
ہفتہ کی شاہ کو وزیر اعلیٰ سندھ کی زیر صدارت کورونا وائرس پر ٹاسک فورس کے 31ویں اجلاس میں بتایا گیا کہ صوبے میں متاثرین کی تعداد 469 ہوگئی ہے۔
ان کیسز میں 265 سکھر، 189 کراچی، ایک دادو، 7 لاڑکانہ اور 7 حیدر آباد میں سامنے آئے ہیں۔
اجلاس کو بتایا گیا کہ آج کراچی میں 12 نئے کیسز سامنے آئے ہیں جس کے بعد مقامی سطح پر منتقل ہونے والے کیسز کی تعداد 132 ہوگئی ہے۔
پنجاب
ملک کے سب سے بڑے صوبے پنجاب میں کورونا وائرس کے 67 نئے کیسز سامنے آئے۔
ترجمان محکمہ صحت پنجاب قیصر آصف کا کہنا تھا کہ صوبے میں مصدقہ متاثرین کی تعداد 497 ہوگئی۔
انہوں نے بتایا کہ اب تک صوبے میں 5 اموات ہوئیں جبکہ 4 مریض صحت یاب ہوئے۔
متاثرین کی تفصیل سے متعلق انہوں نے بتایا کہ ڈیرہ غازی خان سے 207 اور ملتان سے 46 زائرین کے علاوہ لاہور میں 116 افراد میں کورونا وائرس کی تشخیص ہوئی۔
ترجمان کے مطابق گجرات سے 51، گوجرانوالہ سے 9، جہلم سے 19 اور راولپنڈی سے 15 مریضوں رپورٹ ہوئے۔
قیصر آصف نے بتایا کہ باقی متاثرین کی تعداد صوبے کے دیگر علاقوں سے ہے جبکہ تمام مصدقہ مریضوں کو آئیسولیشن وارڈز میں داخل کردیا گیا۔
بعد ازاں وزیر اعلیٰ پنجاب عثمان بزدار نے خصوصی اجلاس کے بعد میڈیا بریفنگ کے دوران صوبے میں کورونا وائرس کے مریضوں کی تعداد 530 ہونے کی تصدیق کی۔
ان کا کہنا تھا کہ ان مریضوں میں ڈیرہ غازی خان میں 207، ملتان میں 75، لاہور میں 119، منڈی بہاوالدین میں 4، گجرات میں 51، گوجرانوالہ میں 10، جہلم میں 19، راولپنڈی میں 15، فیصل آباد میں 9، سرگودھا، میانوالی اور ننکانہ صاحب میں 2، 2 جبکہ نارووال، رحیم یار خان، اٹک، بہاولنگر اور خوشاب میں ایک، ایک مریض شامل ہیں۔
چند گھنٹے بعد محکمہ صحت پنجاب کے ترجمان نے مزید 27 کیسز سامنے آنے کا بتایا۔
ان کا کہنا تھا کہ صوبے میں کورونا وائرس سے اموات کی تعداد 5 ہے جبکہ 5 مریض صحت یاب ہو کر ڈسچارج ہوئے۔
خیبرپختونخوا
ادھر خیبرپختونخوا میں کورونا وائرس سے ایک خاتون انتقال کرگئیں، جس سے صوبے میں اموات کی تعداد 4 ہوگئیں۔
اس حوالے سے صوبائی وزیر اطلاعات کے مشیر اجمل وزیر نے اس موت کی تصدیق کی اور بتایا کہ خاتون کا تعلق لوئر دیر سے تھا۔
مزید برآں خاتون حال ہی میں عمرے سے واپس آئی تھیں اور ان کے انتقال کے بعد پورے گاؤں کو قرنطینہ کردیا گیا۔
بعد ازاں محکمہ صحت خیبر پختونخوا نے مزید 8 کیسز سامنے آنے کی تصدیق کی۔
اس اضافے کے بعد صوبے میں مجموعی کیسز کی تعداد 188 ہوگئی ہے۔
بلوچستان
بلوچستان کے ہیلتھ ڈائریکٹریٹ کورونا وائرس سیل کے ترجمان کے مطابق ہفتہ کو کورونا وائرس کے 5 نئے مریض سامنے آئے جس کے بعد کُل مریضوں کی تعداد 138 ہوگئی۔
انہوں نے بتایا کہ اب تک کورونا وائرس کے ایک ہزار 275 منفی رزلٹ آئے اور مشتبہ مریضوں کی تعداد ایک ہزار 689 ہے جبکہ 2 مریض صحتیاب بھی ہوچکے ہیں۔
اسلام آباد
سرکاری ویب سائٹ کے اعداد و شمار کے مطابق اسلام آباد اور گلگت بلتستان میں نئے کیسز رپورٹ ہوئے۔
ان نئے کیسز میں اسلام آباد میں 12 نئے کیسز سامنے آئے جس کے بعد وہاں متاثرین کی تعداد 39 ہوگئی۔
گلگت بلتستان
گلگت بلتستان میں نئے آنے والے کیسز کی تعداد 16 ہے، جس کے بعد وہاں متاثرین 107 تک پہنچ چکے ہیں۔
ملک میں مجموعی طور پر متاثرین پر نظر ڈالیں تو سندھ سے 469، پنجاب سے 557، خیبرپختونخوا سے 180، بلوچستان سے 138، گلگت بلتستان سے 107، اسلام آباد سے 39 اور آزاد کشمیر سے 2 افراد ہیں۔
تاہم اچھی بات یہ ہے کہ ایک ماہ سے زائد عرصے میں اس وائرس سے 25 افراد صحت یاب بھی ہوچکے ہیں۔
پاکستان میں 12 اموات
پاکستان میں کورونا وائرس سے پہلی ہلاک 18 مارچ کو سامنے آئی جبکہ اسی روز دوسری موت کی بھی تصدیق کردی گئی۔
18 مارچ کو خیبرپختونخوا کے وزیر صحت تیمو جھگڑا نے مردان میں پہلے شخص کے کورونا وائرس کی وجہ سے انتقال کرجانے کے بارے میں آگاہ کیا۔
بعد ازاں کچھ ہی دیر میں انہوں نے ہنگو میں دوسرے فرد کی موت کی تصدیق کی۔
یہ بھی پڑھیں: سندھ ، بلوچستان میں نماز کے اجتماعات پر پابندی
20 مارچ کو ملک کے سب سے بڑے شہر کراچی میں وائرس سے ایک مریض کا انتقال ہوا تو اس طرح تعداد 3 تک جا پہنچی۔
22 مارچ کو خیبرپختونخوا میں ہی ایک اور مریض کے انتقال کی خبر سامنے آئی تو کچھ ہی دیر بعد گلگت بلتستان میں کورونا وائرس سے متاثرہ افراد کا علاج کرنے والا ڈاکٹر اسی عالمی وبا کا شکار ہوکر جان کی بازی ہار گیا۔
اگلے ہی دن یعنی 23 مارچ کو بلوچستان حکومت کی جانب سے صوبے میں کورونا وائرس کا پہلا مریض دم توڑ گیا۔
جہاں ایک طرف متاثرہ افراد کی تعداد میں اضافہ سامنے آرہا تھا وہیں 24 مارچ کو پنجاب میں بھی پہلی ہلاکت سامنے آگئی۔
پنجاب میں ہونے والی یہ موت ملک میں مقامی سطح پر منتقل ہونے والے کیس سے پہلا انتقال تھا۔
علاوہ ازیں 25 مارچ کو بھی ملک میں ایک اور موت کی تصدیق ہوئی اور راولپنڈی میں 50 سالہ خاتون دم توڑ گئیں۔
26 مارچ کو لاہور کے نجی ہسپتال میں ایک مریض جان کی بازی ہار گیا جس کے بعد صوبے میں کورونا وائرس سے 3 اور ملک میں مجموعی طور پر 9 اموات ہوگئیں۔
27 مارچ کو لاہور میں ایک اور مریض کورونا وائرس کے باعث دم توڑ گیا جس کے بعد صوبے میں اموات کی تعداد 4 ہوگئی۔
اسی روز فیصل آباد میں بھی 22 سالہ نوجوان کے جاں بحق ہونے کی تصدیق کی گئی جس کے بعد صوبے میں 5 اور ملک بھر میں اس وبا سے اموات 11 ہوگئیں۔
28 مارچ کو صوبہ خیبرپختونخوا کے وزیراعلیٰ کے مشیر برائے اطلاعات اجمل وزیر نے ایک خاتون کی موت کی تصدیق کی جس کے بعد ملک میں اموات کی تعداد 12 ہوگئی۔
پاکستان میں کورونا وائرس کا پہلا کیس 26 فروری 2020 کو کراچی میں سامنے آیا۔ بعد ازاں سندھ حکومت کی جانب سے یہ تصحیح کی گئی تھی 'غلط فہمی' کے باعث ایک مریض کا 2 مرتبہ اندراج ہونے کے باعث غلطی سے تعداد 15 بتائی گئی تھی تاہم اصل تعداد 14 ہے، اس تصحیح کے بعد ملک میں کورونا کیسز کی تعداد 10 مارچ تک 18 ریکارڈ کی گئی۔ کورونا وائرس سے متعلق اپ ڈیٹ کے لیے یہاں کلک کریں اور تفصیلی خبریں پڑھنے کے لیے یہاں کلک کریں