سرگودھا سے اسلام آباد آنے والی تیز رفتار مسافر ویگن اسلام ٹول پلازہ پر حادثے کا شکار ہوگئی جس کے نتیجے میں 12 مسافر جاں بحق جبکہ 6 شدید زخمی ہوگئے۔

ترجمان موٹروے پولیس کے مطابق سرگودھا سے اسلام آباد آنے والی تیز رفتار مسافر ویگن اسلام آباد ٹول پلازہ کے بوتھ سے ٹکرائی جس کے بعد فیول ٹینک پھٹنے سے ویگن میں آگ لگ گئی۔

ان کا کہنا تھا کہ آگ لگنے سے 9 مسافر موقع پر جاں بحق ہوگئے جبکہ 3 بعدازاں زخموں کی تاب نہ لاتے ہوئے چل بسے۔

مزید پڑھیں: مال گاڑی کو حادثہ، ملک بھر میں مسافر ٹرینیں تاخیر کا شکار

ریسکیو 1122 حکام کا کہنا تھا کہ زخمیوں کو پاکستان انسٹیٹیوٹ آف میڈیکل سائنسز (پمز) ہسپتال کے انتہائی نگہداشت یونٹ (آئی سی یو) منتقل کردیا گیا ہے۔

ڈپٹی کمشنر اسلام آباد کا کہنا ہے کہ جاں بحق افراد میں سے اب تک 4 کی شناخت کی جاچکی ہے۔

انہوں نے نصیر آباد پولیس اسٹیشن حکام کا حوالہ دیتے ہوئے کہا کہ ’حادثہ ممکنہ طور پر بریک فیل ہونے کی وجہ سے ہوا ہے‘۔

یہ بھی پڑھیں: کراچی لفٹ حادثہ: زیر تعمیر عمارت کے مالک اور ٹھیکیدار گرفتار

تاہم انہوں نے یہ بھی کہا کہ ’حادثے کی وجہ گیس سلینڈر کے پھٹنے یا تیز رفتاری بھی ہوسکتی ہے‘۔

ڈپٹی کمشنر کا کہنا تھا کہ واقعہ اسلام آباد کی حدود میں نہیں ہوا ہے جس کی وجہ سے موٹر وے پولیس کو انکوائری کرنے کی ہدایت کی گئی ہے۔