لاہور ہائی کورٹ نے پنجاب اسمبلی میں اپوزیشن لیڈر حمزہ شہباز کے گھر کے باہر رکاوٹیں فوری ہٹانے کا حکم دے دیا۔

ہائی کورٹ کے جسٹس علی اکبر قریشی نے شہری منیر احمد کی حمزہ شہباز کے گھر کے باہر رکاوٹیں نہ ہٹانے کے خلاف درخواست کی سماعت کی۔

درخواست میں پنجاب حکومت، سیکریٹری داخلہ، ڈی جی ایل ڈی اے اور دیگر کو فریق بنایا گیا تھا۔

درخواست میں موقف اختیار کیا گیا تھا کہ جوڈیشل کالونی میں حمزہ شہباز نے اپنے گھر کے پیچھے گلی میں ناجائز رکاوٹیں کھڑی کر رکھی ہیں اور سرکاری زمین پر جنریٹر کی تنصیب کے لیے رکاوٹیں بنائی گئی ہیں۔

مزید پڑھیں: آئی ایس آئی کو سڑک سے رکاوٹیں ہٹانے کیلئے 8 ہفتے کی مہلت

درخواست گزار کا کہنا تھا کہ سیکورٹی کے نام پر رکاوٹیں آئین کی خلاف ورزی ہے اور سپریم کورٹ کے احکامات کے باوجود سڑک سے رکاوٹیں نہیں ہٹائی گئیں۔

عدالت نے سی سی پی او اور ڈی سی کو حمزہ شہباز کے گھر کے باہر سے رکاوٹیں فوری ہٹانے کا حکم دے دیا۔

عدالت نے کیس کی سماعت 25 ستمبر تک ملتوی کرتے ہوئے عمل درآمد رپورٹ طلب کرلی۔