اسلام آباد: شوال 1439 ہجری کا چاند دیکھنے کے لیے مرکزی رویت ہلال کمیٹی کا کراچی میں اجلاس جاری ہے۔

محمکمہ موسمیات کا کہنا تھا کہ پنجاب میں آج چاند دکھنے کے امکانات بہت کم ہیں تاہم گوادر اور پسنی سمیت ساحلی پٹی پر چاند نظر آنے کے امکانات ہیں۔

انہوں نے بتایا کہ شوال کا چاند بدھ اور جمعرات کی درمیانی شب 12 بجکر 43 منٹ پر پیدا ہوچکا ہے۔

مزید پڑھیں: ملک بھر میں جمعرات سے رمضان المبارک کا آغاز

شوال کے چاند کی رویت کا اعلان کرنے کے لیے کمیٹی کی صدارت چئیرمین مرکزی رویت ہلال کمیٹی مفتی منیب الرحمٰن کر رہے ہیں۔

اس کے علاوہ زونل رویت ہلال کمیٹیوں کے اجلاس تمام صوبائی دارالحکومت اور وزارت مذہبی امور اسلام آباد کے دفتر میں بھی جاری ہیں۔

وزارت مذہبی امور کے جاری کردہ مراسلے میں عوام الناس سے درخواست کی گئی کہ چاند کی رویت کی شہادت ان نمبروں (99261413-021، 99261414-021، 9285203-0300) پر ریکارڈ کروائیں۔

خیال رہے کہ جمعرات کو چاند کی رویت کی صورت میں 15 جون بروز جمعہ عیدالفطر ہوگی تاہم چاند کی رویت نہ ہوئی تو عیدالفطر 16 جون بروز ہفتہ ہوگی۔

یہ بھی پڑھیں: 2018 میں کتنے چاند اور سورج گرہن ہوں گے؟

یاد رہے کہ محکمہ موسمیات سمیت چاند کے حوالے سے مشاہدہ کرنے والے دیگر اداروں نے دعویٰ کیا ہے کہ جمعرات کے روز پاکستان میں چاند کی رویت ممکن نہیں اور ان کے مطابق عیدالفطر بروز ہفتہ ہوگی۔

واضح رہے کہ رمضان المبارک 1439 ہجری کا آغاز 17 مئی 2018 بروز جمعرات سے ہوا تھا۔