پاک فوج نے ان رپورٹس کی سختی سے تردید کی ہے جن میں دعویٰ کیا جارہا ہے کہ ملک کے عسکری ادارے کی جانب سے شہریوں کو مبینہ طور پر ذاتی نوعیت کی معلومات کے حصول کے لیے فون کلالز کی جارہی ہیں۔

پاک فوج کے شعبہ تعلقات عامہ آئی ایس پی آر کے ڈائریکٹر جنرل (ڈی جی) میجر جنرل آصف غفور نے سماجی رابطے کی ویب سائٹ فیس بک پر ایک جاری پیغام میں ایسی رپورٹس کو جعلی قرار دیا۔

انہوں نے کہا کہ خود کو پاک فوج کا نمائندہ بتانے والا شخص شہریوں کو فون کر کے مردم شماری کے حوالے سے ان سے ذاتی نوعیت کی معلومات حاصل کررہا ہے، جس میں شہریوں کے شناختی کارڈ نمبرز اور بینک اکاونٹس وغیرہ کی معلومات شامل ہیں۔

آئی ایس پی آر نے اپنے پیغام میں عوام کو خبردار کیا ہے کہ پاک فوج کی جانب سے کسی کو بھی اس قسم کی فون کالز نہیں کی جارہیں۔

عوامی آگاہی کے لیے جاری بیان میں آئی ایس پی آر کا کہنا تھا کہ شہری ایسی فون کالز پر اپنی معلومات فراہم نہ کریں اور اس قسم کی فون کالز کے حوالے سے فوری طور پر فوج کے ہیلپ لائن نمبر 1125 پر اطلاع دیں۔