ڈیرہ اسماعیل خان: دربان کے علاقے میں پولیس کی گاڑی پر نامعلوم دہشت گردوں کی فائرنگ سے دو پولیس اہلکار ہلاک جبکہ دو زخمی ہوگئے۔

پولیس کا کہنا ہے کہ ڈیرہ اسماعیل خان کے علاقے دربان میں گشت کرنے والی پولیس وین پر مبینہ دہشت گردوں نے فائرنگ کردی جس کے نتیجے میں سپاہی اعظم اور منیر ہلاک ہوگئے۔

واقعے کے بعد پولیس کی مزید نفری نے موقع پر پہنچ کر زخمی پولیس اہلکاروں اے ایس آئی عبدالستار اور سپاہی شاہ جہان کو ڈسٹرکٹ ہیڈ کوارٹر ہسپتال منتقل کیا، جہاں ان کی حالت خطرے سے باہر بتائی جارہی ہے۔

پولیس نے علاقے کو گھیرے میں لے کر حملہ آوروں کی تلاش کے لیے سرچ آپریشن کا آغاز کردیا ہے۔

یاد رہے کہ حملہ اس وقت کیا گیا ہے جب ضلع بھر میں بلدیاتی انتخابات کے انعقاد کے لیے سیکیورٹی ہائی الرٹ کی گئی ہے۔