گلوکار عاطف اسلم کی مداح پاکستانی نژاد کینیڈین لڑکی نے پسندیدہ فنکار کے میوزک کنسرٹ کے لیے اپنی شادی ہی ملتوی کردی۔

جی ہاں، کینیڈا میں مقیم پاکستانی نژاد لڑکی نے منگنی کرنے اور شادی کی تاریخیں طے کرنے کے باوجود عاطف اسلم کے میوزک کنسرٹ میں شرکت کے لیے اپنی شادی ملتوی کردی۔

اس بات کا انکشاف خود عاطف اسلم نے حال ہی میں کینیڈا میں کیے گئے میوزک کنسرٹ کی پرفارمنس کے دوران کیا۔

عاطف اسلم ان دنوں امریکا اور کینیڈا کے ٹوئٹر پر موجود ہیں، جہاں وہ امریکا کے متعدد شہروں میں پرفارمنس کرنے کے بعد کینیڈا کے شہروں میں کنسرٹس کرتے دکھائی دے رہے ہیں۔

انہوں نے 22 مئی کو ٹورنٹو میں ہونے والے کنسرٹ کی لائیو پرفارمنس کے دوران ایک بینر کو ہاتھ میں تھام کر پرفارمنس کی اور بعد ازاں مذکورہ بینر پر لکھی گئی داستان کی کہانی بھی سنائی۔

عاطف اسلم کے ہاتھ میں موجود بینر پر ایک شخص نے لکھ رکھا تھا کہ ان کی منگیتر نے گلوکار کے مذکورہ کنسرٹ میں شرکت کے لیے شادی ملتوی کی۔

عاطف اسلم نے لائیو پرفارمنس کے بعد بینر تھمانے والے لڑکے کو مخاطب ہوتے ہوئے مذاق میں کہا کہ ان کی منگنی تو ہوگئی نا، پھر منگنی کا عاطف اسلم کے حصے کا کھانا کدھر ہے؟

بعد ازاں گلوکار نے بینر تھمانے والے نوجوان کو کہا کہ وہ انہیں پین لاکر دیں تو وہ بینر پر اپنے دستخط کردیں گے۔

عاطف اسلم کی مذکورہ ویڈیو ان کے فین نے ٹوئٹر اور یوٹیوب پر شیئر کی، جو دیکھتے ہی دیکھتے وائرل ہوگئی۔

اگرچہ یہ بات واضح ہو گئی کہ عاطف اسلم کے کنسرٹ کے لیے لڑکی نے شادی ملتوی کی، تہم یہ معلوم نہ ہو سکا کہ پاکستانی نژاد لڑکی کا تعلق کس شہر سے تھا اور اب وہ کب تک شادی کا ارادہ رکھتی ہیں۔

عاطف اسلم کینیڈا کے مختلف شہروں میں آئندہ ماہ 26 جون تک کنسرٹس منعقد کرتے رہیں گے تو خیال کیا جا رہا ہے کہ مذکورہ لڑکی بھی جون کے بعد ہی شادی کے بندھن میں بندھیں گی۔