جانسن اینڈ جانسن کووڈ ویکسین ڈیلٹا قسم کے خلاف مؤثر قرار
جانسن اینڈ جانسن نے کہا ہے کہ اس کی سنگل ڈوز کووڈ 19 ویکسین کورونا کی بہت زیادہ متعدی ڈیلٹا قسم کے خلاف مؤثر ثابت ہوئی ہے اور مدافعتی ردعمل کم از کم 8 ماہ تک برقرار رہتا ہے۔
کمپنی کی جانب سے 2 تحقیقی رپورٹس کو جاری کیا گیا۔
ایک تحقیق میں 8 افراد شامل تھے جن کو جانسن اینڈ جانسن کی کووڈ ویکسین کا استعمال کرایا گیا تھا۔
تحقیق میں ان افراد کے خون میں موجود مدافعتی نظام کے خلیات اور اینٹی باڈیز کو سب سے بھارت میں دریافت ہونے والی کورونا کی قسم ڈیلٹا کو مؤثر طریقے سے ناکارہ بناتے ہوئے دریافت کیا گیا۔
دوسری تحقیق ویکسین استعمال کرنےوالے 20 افراد پر مبنی تھی۔
دونوں تحقیقی رپورٹس کو کسی طبی جریدے میں شائع نہیں کیا گیا بلکہ پری پرنٹ سرور bioRxiv پر شائع کیا گیا۔
جانسن اینڈ جانسن کے چیف سائنٹیفک آفیسر پال اسٹوفلز نے بتایا کہ ہمارا ماننا ہے کہ ہماری ویکسین سے کووڈ 19 کے خلاف دیرپا تحفظ اور ڈیلٹا کو ناکارہ بنانے والی سرگرمیوں کی سطح میں اضافہ ہوتا ہے۔
جانسن اینڈ جانسن کی ذیلی شاخ جانسین کے ریسرچ اینڈ ڈویلپمنٹ کے سربراہ میتھائی مامین نے بتایا کہ یہ ڈیٹا 8 ماہ تک جاری رہنے والی تحقیق کا ہے، جس سے ثابت ہوتا ہے کہ یہ سنگ ڈوز ویکسین مضبوط اینٹی بادی ردعمل پیدا کرتی ہے جس کا اثر کم ہونے کی بجائے وقت کے ساتھ بڑھتا ہے۔