پاکستانی ماڈل حسنین لہری نے فوٹو اینڈ ویڈیو شیئرنگ ایپ انسٹاگرام پر شیئر کی گئی پوسٹ میں اپنے مرحوم والد کی یاد میں ایک جذباتی پیغام لکھا ہے۔

خیال رہے کہ حسنین لہری کے والد 22 مئی کو انتقال کرگئے تھے۔

حسنین لہری نے انسٹاگرام پر ایک پوسٹ شیئر کی، جس میں انہوں نے اپنے والد کا ہاتھ تھام رکھا ہے۔

انہوں نے لکھا کہ 'پاپا جان آخری مرتبہ آپ کا ہاتھ تھامنا میری زندگی کا مشکل ترین کام تھا'۔

حسنین لہری نے مزید لکھا کہ 'یہ وہ قیمت ہے جو آپ نے بہترین والد ہونے کی حیثیت سے ادا کی، آپ کو خوشی کے بہت سے بہترین لمحات ملے اور آخر میں آنسو بھی ملے'۔

انہوں نے لکھا کہ 'میں آپ سے محبت کرتا ہوں اور آپ کو بہت زیادہ یاد کرتا ہوں، پاپا جان میں ہر وقت آپ سے بات کرتا ہوں، اُمید ہے آپ مجھے سنتے ہیں'۔

اپنی پوسٹ میں انہوں نے مزید لکھا کہ اللہ مجھے ہمت دے اور صبر عطا فرمائے۔

حسنین لہری نے ٹوئٹر پر بھی مذکورہ تصویر شیئر کی جس پر مداحوں کی جانب سے ان کے والد کے انتقال پر دکھ کا اظہار کیا گیا۔

خیال رہے کہ 2 برس حسنین لہری نے اپنے چھوٹے بھائی منصور لہری کو کھودیا تھا، جن کا انتقال 26 مئی 2019 کو ہارٹ اٹیک کے باعث انتقال کرگئے تھے۔