ایران کے محکمہ صحت کا کہنا ہے کہ ملک میں گزشتہ 24 گھنٹوں میں کورونا کیسز کی تعداد میں ریکارڈ اضافہ ہوا ہے، جس میں 13 ہزار 53 نئے کورونا کیسز رپورٹ ہوئے جبکہ 486 افراد کی موت ہوئی۔

برطانوی خبر رساں ادارے 'رائٹرز' کے مطابق مشرق وسطیٰ کے ممالک میں سب سے زیادہ متاثر ہونے والے ملک ایران کی حکومت کا کہنا تھا کہ وبا کے پھیلاؤ کو روکنے کے لیے سخت پابندیاں لگائی جائیں گی۔

وزارت صحت کی ترجمان سیما لاری نے مقامی ٹیلی ویژن کو بتایا کہ کورونا سے متاثرہ مریضوں کی تعداد 7 لاکھ 75 ہزار 121 تک پہنچ گئی ہے جبکہ ملک میں کورونا کے باعث مرنے والوں کی تعداد 41 ہزار 979 تک بڑھ چکی ہے۔