یہ کانفرنس اپنے 12 برسوں کے سفر میں متعدد بار نشیب و فراز سے گزری۔ رواں برس رونما ہونے والے کچھ ایسے پہلو ہیں، جن پر بات کرنے کی ضرورت ہے، وگرنہ یہ تاثر پھیل کر کانفرنس کے علمی اغراض و مقاصد کو متاثر کرسکتا ہے۔

اس کانفرنس کے انعقاد کے ساتھ ساتھ یہ بھی یاد رکھنے کی ضرورت ہے کہ یہ ایک ادبی کانفرنس ہے، جس میں اہلِ قلم شریک ہوتے ہیں۔ ایک ایسی سرگرمی جس میں شریک مصنفین کا انتخاب بہت سوچ سمجھ کر ہونا چاہیے، اسی طرح مقالہ نگاروں اور نظامت کے معاملات کو بھی بغور دیکھ لینا چاہیے۔

سیشنز غیر معمولی تاخیر کا شکار

اس مرتبہ پہلی انہونی یہ ہوئی کہ 4 روزہ عالمی اردو کانفرنس کا افتتاحی اجلاس غیر معمولی تاخیر کا شکار صرف اس لیے ہوا کیونکہ وزیرِاعلی سندھ کو آنے میں دیر ہوگئی، حالانکہ ادب لکھنے اور پڑھنے والے وقت پر موجود تھے۔ سمجھنے کی بات یہ ہے کہ یہ روایت غلط ہے کہ بزرگ اور پھر وہ بھی تخلیق کار اس وقت تک انتظار کریں جب تک سیاسی شخصیات پہنچ نہ جائیں اور ان کے تشریف لانے پر ہی منچ پر تماشا شروع ہو۔ اگرچہ رسمی طور پر اس تاخیر کی معذرت بھی ہوئی، لیکن یہ رسم کب تک نبھائی جائے گی؟

کچھ مندوبین سے جان چھڑانا ناگزیر ہوگیا

اسی طرح کانفرنس میں بہت سارے مندوبین ایسے ہیں جن کو اب رخصت پر بھیج دینا چاہیے کیونکہ ان کے پاس اب کہنے کو کچھ نیا نہیں ہوتا۔ وہ مسلسل تکرار اور یکسانیت کا شکار ہیں۔ مثال کے طور پر کانفرنس کے پہلے روز غالب کے سیشن میں ایک صاحب گزشتہ کئی برسوں کی طرح اس بار بھی بالکل اسی انداز میں کہنے لگے کہ ان کے پاس کوئی باقاعدہ مقالہ تو نہیں ہے، البتہ وہ کچھ نوٹس لائے ہیں، جن کی مدد سے اظہارِ خیال کریں گے اور انہوں نے عملی طور پر یہی کیا۔ وہ ہر سال اپنے سیشن کے موقع پر اسی منتشر خیالی کا اظہار کرتے ہیں۔ انہیں چاہیے کہ وہ باقاعدہ مقالہ لکھ کر لائیں، اگر ایسا نہیں کرسکتے تو متعلقہ موضوع پر مربوط گفتگو کریں، جو وہ بالکل نہیں کرتے۔ اس لیے یہ بہت بہتر رہے گا کہ ایسے تمام افراد کو کچھ وقفہ دے دیا جائے، تاکہ انہیں تیاری کے لیے کچھ وقت میسر آسکے۔

ان کے مقابلے میں ایسے اہلِ قلم کو موقع ملنا چاہیے جو اپنا کام سنجیدگی سے کرتے ہیں اور ہر بار اس طرح کی نمائشی عاجزی اور انکساری سے کام نہیں لیں گے۔

سمجھنا ہوگا کہ یہ ’صحافتی‘ نہیں ’ادبی‘ میلہ ہے

اس کانفرنس میں صحافت بتدریج ادب پر غالب آتی جا رہی ہے جس پر انتظامیہ بالخصوص احمد شاہ صاحب کو قابو پانا چاہیے۔ سہیل وڑائچ، حامد میر، نعیم بخاری کے سیشن سمیت مختلف مقامات پر کانفرنس میں صحافیوں کی ایک بڑی تعداد کی شرکت بطورِ مندوبین درست سمت نہیں ہے، ماسوائے وہ صحافی جو تخلیقی تصنیف وتالیف کرتے ہیں، کیونکہ ان کا شریک ہونا اور بات ہے۔

لیکن صحافیوں کو صرف اس لیے شامل کرلیا جائے کہ میڈیا کوریج اچھی مل جائے گی یا ایونٹ میں کوئی بریکنگ مل جائے گی، میرے خیال میں یہ درست طرزِ عمل نہیں ہے اور یوں اس کانفرنس کی ادبیت کو متاثر نہیں ہونا چاہیے۔

ابھی حال ہی میں معروف صحافی ناصر بیگ چغتائی نے کشمیر کے تناظر میں طبع زاد ناول ’سلگتے چنار‘ لکھا ہے، انہیں اس ادبی کانفرنس کا حصہ بنانا چاہیے تھا نہ کہ ایسے صحافیوں کو شامل کیا جائے، جن کے ہاں تخلیقی ادب کی کوئی روایت ہی نہیں ہے۔

وقت کی پابندی نہ کرنے والوں سے نمٹا جائے

اسی کانفرنس میں ایک اور اہم رویہ متعدد بار دیکھنے کو ملتا ہے، جس کا نفسیاتی تجزیہ کرنے کے ساتھ ساتھ اس پر کانفرنس کی انتظامیہ کو ایکشن لینے کی بھی ضرورت ہے۔ وہ یہ کہ ہمارے اکثر سینئر قلم کار اور مقالہ نگار اس وقت انتہائی بوجھل پن کا باعث بنتے ہیں، جب انہیں اسٹیج پر ایک بار مائیک مل جائے، بس پھر وہ اس کو چھوڑنے کے لیے تیار ہی نہیں ہوتے۔

جیسے اس کانفرنس کے پہلے ہی دن اس وقت ایک تماشا ہوا جب غالب پر سیشن چل رہا تھا۔ لاہور سے آئے ایک ادیب کا عالم بے تابی یہ تھا کہ ان کو سیشن کی ناظمہ نے متعدد بار روکا، درخواست کی کہ وقت کم ہے آپ اپنا مقالہ ختم کریں یا پھر یہیں روک دیں۔ لیکن مجال ہے کہ ان کے کان پر جوں تک رینگی ہو۔ وہ ڈائس پر رکھی پانی کی بوتل سے پانی پیتے رہے اور مقالہ پڑھتے رہے۔ ساتھ ساتھ یہ بھی کہتے رہے، مقالہ تو طویل ہے، لیکن میں مختصر پڑھوں گا، اور یوں وہ اس سیشن کا نصف سے زائد وقت ڈکار گئے۔ وہ تو مقامِ شکر ہے کہ ان کی بوتل میں پانی ختم ہوگیا جس پر بوجہ مجبوری انہیں مقالہ ختم کرنا پڑا۔ اگر چھوٹی کی بجائے بڑی پانی کی بوتل ہوتی، تو یقینی طور پر غالب کو وہ اس میں ڈبو کر دم لیتے اور ساتھ میں حاضرین کو بھی۔

دوسری طرف ایک غیر ملکی اسکالر ’پروفیسر ہیروجی کتاؤکا‘ جو جاپان سے تشریف لائے تھے، ان کی اخلاقیات کا عالم یہ تھا کہ جب ان کو پہلی بار احساس دلایا گیا کہ مقالہ مقررہ وقت سے آگے بڑھ رہا ہے، لہٰذا اسے ختم کردیں تو انہوں نے اسی سطر پر، جو وہ پڑھ رہے تھے اپنا مقالہ روک دیا اور حاضرین سے اجازت لے لی۔

ادیبوں کی بوکھلاہٹ

صرف یہی نہیں بلکہ ایک اور سیشن میں جہاں وہ دیگر مقالہ نگاروں کے ساتھ اپنے مقالے کو پیش کر رہے تھے، جس کا موضوع سعادت حسن منٹو تھا، ان کے 3 افسانوں، 'کھول دو'، 'ٹھنڈا گوشت' اور 'ٹوبہ ٹیک سنگھ' کے اقتباسات اور حوالہ جات کو اپنی تنقید کے ساتھ بیان کررہے تھے۔ ایسے میں جب انہوں نے منٹو کے افسانے ’کھول دو‘ کی چند سطریں کوڈ کیں تو ادیبوں کی اکثریت نے بے چینی سے پہلو بدلنے شروع کردیے اور کتاؤکا صاحب کو روکنے کے لیے ناظم نے بھی ہاتھ پیر مارے، لیکن انہوں نے بھی ہار نہ مانی اور وہ سطور پڑھیں، جن پر اسٹیج پر بیٹھے ادیبوں کو تو اعتراض تھا مگر حاضرین چاہتے تھے کہ وہ اپنا مقالہ جاری رکھیں۔ یوں انہوں نے جاری رکھا اور کہا کہ ’منٹو فحش افسانہ نگار نہیں تھا‘۔

آپ صرف ذہنی پستی کا حال دیکھیے کہ نیٹ فلیکس کے زمانے میں بھی ان کو منٹو فحش لگتا ہے۔ منٹو اور ان کا کام پوری طرح بیان ہوچکا، لیکن یہ چند بزرگ ذہنی طور پر 60 کی دہائی سے باہر آنے کو تیار نہیں ہیں۔

اس طرح کے منفی رویوں کی وجہ سے کئی سیشن خراب ہوئے، جبکہ مقالہ نگاروں کے مائیک سے چمٹے رہنے کی وجہ سے اکثر سیشن تاخیر کا شکار بھی ہوئے۔ اس سے اچھا تو پھر وہی طریقہ تھا جب ماضی میں صدر آرٹس کونسل زبردستی گفتگو روک دیا کرتے تھے اور سب اس فعل کو بدتمیزی قرار دیتے تھے۔

انور مقصد کے سیشن میں بدنظمی

پھر اسی صورتحال میں کانفرنس کے آخری روز انور مقصود کے سیشن کو لان میں رکھنا بھی بدترین انتظامی فیصلہ تھا، جس کی وجہ سے حاضرین کی ایک بڑی تعداد انہیں واضح طور پر سن ہی نہ سکی۔ ساؤنڈ کی خرابی کے ساتھ ساتھ کھلی فضا میں آواز کا تاثر بھی نہ بن پایا، اور پھر دیگر کئی تکنیکی خرابیوں اور بے ہنگم ہجوم نے سارا ماحول خراب کردیا۔

کانفرنس کو یکسانیت سے بچائیے

کانفرنس کو یکسانیت سے بچانے کے لیے ایسے ناموں سے بھی پرہیز کرنا چاہیے جو صرف خانہ پُری کے لیے اس کانفرنس میں شریک ہوتے ہیں۔ ، جیسے ایک آدھ سیشن میں شرکت کی خاطر آنے والے کچھ اہلِ قلم ہیں جو سنجیدگی سے مقالہ وغیرہ لکھ کر بھی نہیں لاتے اور ایسا پہلی مرتبہ نہیں ہوا بلکہ یہ ان کی ایک عام عادت بن چکی ہے۔

سوچنے اور سمجھنے کی بات یہ ہے کہ کیا ان کے علاوہ اور لکھنے والے ختم ہوگئے ہیں؟ ان میں اکثریت ان مندوبین کی ہے جو میلہ چیمپئن ہیں، یعنی پاکستان بھر کے ادبی میلوں میں شرکت کرنے کے ریکارڈز توڑتے رہتے ہیں۔ ایسے ناموں کو بھی رخصت پر بھیجنا چاہیے وگرنہ یہ اپنی یکسانیت کو کانفرنس کی انفرادیت پر بھی غالب لے آئیں گے اور پھر یہ کانفرنس اپنی کشش کھو بیٹھے گی۔

اسی تناظر میں عالمی پہلو سے ایک مثال دوں تو یورپ اور امریکا کو ملا کر چند ممالک سے پاکستانی خواتین قلم کار شرکت کے لیے ہر سال اپنا ٹکٹ خرید کرخود اس کانفرنس میں شریک ہوتی ہیں۔ ان میں سے ایک آدھ خاتون کو چھوڑ کر باقی سب کی حالت بھی قابلِ رحم ہے۔ ایک تو یہ خواتین متعلقہ موضوع پر تیاری کرکے نہیں آتیں، پھر موضوع پر بات کرنے اور اپنی تخلیقات پر فوکس کرنے کے بجائے ان کی گفتگو کا زیادہ محور ان کی اپنی ذات ہوتی ہے۔

مثال کے طور پر امریکا سے آئی ایک خاتون کو میں نے اسٹیج پر دورانِ سیشن یہ کہتے سنا ’ابھی چونکہ میری گاڑی مجھے لینے نہیں آئی، لہٰذا میں کچھ دیر اور بات کرسکتی ہوں‘۔ ان کی بار بار آمد اور زبردست حوصلے کی بڑی وجہ ہمارے کچھ سینئر بزرگ ہیں جو ان خواتین کی مصنوعی حوصلہ افزائی کرکے اپنا وقت اچھا پاس کررہے ہوتے ہیں۔ یہ بھی ایک دردناک منظر نامہ ہے، جو کانفرنس میں کئی برسوں سے دیکھنے کو مل رہا ہے۔

اس طرح کے کئی اور پہلو بھی ہیں جن پر روشنی ڈالی جاسکتی ہے، لیکن بات یہ ہے کہ شعری و ادبی حلقوں کی یہ شدید خواہش ہے کہ یہ سلسلہ جاری و ساری رہے۔ پھر جہاں اس کے معیار کو برقرار رکھنے کے لیے انتظامیہ کو کئی چیزوں کا پابند ہونا پڑے گا، وہیں اہلِ قلم اور حاضرین کو بھی اپنے رویوں میں تبدیلی لانا ہوگی، ورنہ شہر میں بہت سارے دوسرے ایونٹس کی طرح یہ بھی محض ایک ایونٹ بن کر رہ جائے گا جہاں میلہ تو لگے گا مگر ادبیت اور تہذیبی رچاؤ نہیں ہوگا۔ یہ بات کہنے کو عام سہی لیکن بہت اہم ہے، جس پر غور کرنے کی اشد ضرورت ہے۔