عرب فیشن کونسل (اے ایف سی) کے زیر اہتمام سعودی عرب میں تاریخ کے پہلے فیشن ویک کا اہتمام کیا گیا۔

اگرچہ اس فیشن ویک کو گزشتہ ماہ 26 مارچ کو منعقد ہونا تھا، تاہم اس کا انعقاد 2 ہفتوں کی تاخیر کے 11 اپریل سے کیا گیا جو 14 اپریل تک جاری رہا۔

چار روزہ فیشن ویک میں نہ صرف مقامی فیشن ڈیزائنر بلکہ دیگر عرب ممالک سمیت پیرس، لندن اور اٹلی کی فیشن ڈیزائنر خواتین نے بھی شرکت کی۔

خبر رساں ادارے ’اے پی‘ کے مطابق فیشن ویک میں مشرق وسطیٰ کے متعدد ممالک کی معروف فیشن ڈیزائنرز سمیت برازیل، امریکا اور روس کی ڈیزائنر نے بھی شرکت کی۔

فیشن ویک میں انوکھے اور جدید انداز کی ملبوسات کی نمائش کی گئی۔

فیشن ویک میں جہاں صرف خواتین کو ریمپ پر واک کرنے کی اجازت تھی، وہیں صرف خواتین کے ملبوسات ہی پیش کیے گئے اور اس میں شرکت کی اجازت بھی صرف خواتین کو ہی تھی۔

فیشن ویک کا اہتمام دارالحکومت ریاض کے اپیکس سینٹر میں کیا گیا، جہاں کسی بھی طرح کی ویڈیوز بنانے اور تصاویر نکالنے پر بھی پابندی عائد کردی گئی تھی۔

خیال رہے کہ عرب فیشن کونسل کے تحت دبئی سمیت مشرق وسطیٰ کے دیگر ممالک میں فیشن ویکس کا انعقاد ہوتا رہتا ہے۔

پہلی بار عرب فیشن کونسل نے سعودی عرب میں فیشن ویک کا اہتمام کیا، جب کہ کونسل نے رواں برس اکتوبر میں دوسرے فیشن ویک کا بھی اعلان کر رکھا ہے۔